काठमाडौं, १६ मंसिर । सरकार तथा राष्ट्र बैंकको नीतिका कारण समस्यामा परेका अटोमोबाइल्स व्यवसायीहरुले विरोध कार्यक्रम सार्वजनिक गरेका छन् । सरकारी नीतिको विरोध गर्दै उनीहरुले चरणबद्ध आन्दोलन घोषणा गरेका हुन । अटो व्यवसायीले शतप्रतिशत नगद मार्जिन र ५० प्रतिशत नगद मार्जिन व्यवस्था खारेजीको माग गर्दै मंसिर २२ गतेसम्म पहिलो चरणका कार्यक्रम सार्वजनिक गरेका हुन ।

चालू पुँजी कर्जा मार्गदर्शन खारेज, मौद्रिक नीति परिमार्जन, ब्याजदर नियन्त्रण र गाडी आयात फुकुवा माग गर्दै आन्दोलन घोषणा गरेका छन् ।

जसले कर तिरेको छ उसैलाई सरकारले पेलेको व्यवसायीले आरोप लगाएका छन् । नाडा अटोमोबाइल्स एसोसिएसन अफ नेपालका अध्यक्ष ध्रुव थापाले बाध्यात्मक परिस्थिति आएको बताउनुभयो । २१ प्रतिशत राजस्व योगदान अटो क्षेत्रले दिए पनि सरकारले अटोमोबाइल्सलाई प्राथमिकता नदिएको बताउनुभयो ।

उहाले ८ महिनादेखि अटो व्यवसाय बन्दप्रायः रहेको बताउदै १ लाख रोजगारी सिर्जना गरेको यस क्षेत्रमा ३० प्रतिशत कटौती भएको दावी गर्नुभयो । उहाले गाडीमा ५० प्रतिशत र पार्टस १०० प्रतिशत नगद मार्जिन राख्नुपरेको भन्दै असन्तुष्टि ब्यक्त गर्नुभयो । उहाले अटोमोबाइल्स व्यवसायी सडकमा जाने अवस्थामा भएको बताउनुभयो ।

अध्यक्ष थापाले समस्या समाधान नभए पुनः आन्दोलन घोषणा गर्ने जानकारी दिनुभयो । नाडाका महासचिव सुरेन्द्र कुमार उप्रेतीले सरकारका कारण ५८ वटा डिलर बन्द भएको बताउनुभयो । नाडाका अनुसार अटो क्षेत्रमा १ खर्ब लगानी रहेको छ भने १० हजार व्यवसायी रहेका छन्।