काठमाडौं, ९ माघ । वाम गठबन्धन र मधेश केन्द्रीत दल राष्ट्रियसभाको चुनाव, भावी सरकार गठन लगायत विषयमा सहकार्य गर्न सकारात्मक भए पछि कांग्रेस एक्लिने सम्भावन बढेर गएको छ ।
नेकपा एमाले संसदीय दलको कार्यालय, सिंहदरबारमा बिहान भएको संयुक्त छलफलमा स्थानीय तह, प्रदेशसभा र प्रतिनिधिसभा निर्वाचनको जनादेश बमोजिम मुलुकलाई अगाडि बढाउने विषयमा सकारात्मक छलफल भएको एमाले स्थायी कमिटीका सदस्य सुवास नेम्वाङले जानकारी दिए । ठोस सहमति भएमा वाम गठबन्धन र मधेशी दलबीच आसन्न राष्ट्रियसभा सदस्यको चुनावमा तालमेल हुने भएको छ ।
एमाले र नेकपा माओवादी केन्द्र सम्मिलित वाम गठबन्धन तथा राष्ट्रिय जनता पार्टी राजपा नेपाल र संघीय समाजवादी फोरम नेपालका नेताबीचको छलफल देशको नेतृत्व एमालेले र २ नम्बर प्रदेशको नेतृत्व मधेसी दलले गर्नेमा एकमत देखिएको छ ।
वाम गठबन्धन र मधेसी दलबिचको यो छलफलले नेपाली कांग्रेस एक्लिने संकेत मिलेको छ । यसअघि राजपाले राष्ट्रियसभा चुनावमा नेपाली कांग्रेससँग पनि छलफल गर्ने निर्णय गरेको थियो । तर आन्तरिक किचलोमा परेको कांग्रेससँग भन्दा वाम गठबन्धनसँगको सहकार्य फाइदाजनक हुने ठानेपछि राजपा गठबन्धनप्रति आकर्षित भएको हो ।
बिहानको छलफल सकरात्मक भएको र आ–आफ्नो दलमा थप छलफल गरेर अहिले ३ बजे बस्ने बस्ने सहमति भएको माओवादी केन्द्रका नेता मातृका यादवले जानकारी दिए ।
बैठकमा एमालेका नेम्वाङ र अग्निप्रसाद खरेल, माओवादी केन्द्रका वर्षमान पुन र यादव, राजपाका सर्वेन्द्रनाथ शुक्ल र केशव झा तथा फोरमका राजेन्द्र श्रेष्ठ सहभागी रहेका थिए । ।
प्रतिक्रिया दिनुहोस्