काठमाडौं, १० असोज । पूर्व परराष्ट्रमन्त्री एवम् राजनीतिक विश्लेषक रमेशनाथ पाण्डे आगामी चुनाव आफैं संकटमा परेको बताएका छन् ।
एबीसी न्यूजसँग कुरा गर्दै उनले विगतमा राजनीतिक पार्टी र उम्मेदवारहरु को, कसले जित्ला या हार्ला भनेर चिन्ता हुने गरेको तर अहिले भने चुनाव आफैंमा संकटमा परेको बताए ।
“यसले जित्ला वा हार्ला त्यो अर्कै कुरा भयो । चुनाव आफैं संकटमा परेको छ । पहिला पार्टी समाप्त हुन्छ रे ! उम्मेदवार सबै हार्छ रे ! भन्ने हुन्थ्यो तर, अहिले चुनावै निरर्थक होला भन्ने भयो”, उनले भने ।
चुनाव अगावै आर्थिक संकट !
एक त देशका सबैजसो राजनीतिक दलहरुमा झगडा रहेकाले पार्टी कमजोर भएको उनले बताए । “पार्टी कमजोर भएपछि मुलुकको स्थिती धेरै बिग्रियो । चुनावभन्दा अगाडि नै यहाँ आर्थिक संकट परिसक्या हुन सक्छ । कर्मचारीलाई कहाँबाट तलब दिनुहुन्छ ? चुनाव कसरी गराउनुहुन्छ ?”, पार्टी सबै फट्ने अवस्थामा रहेको समेत उनको विश्लेषण छ ।
यसैले गर्दा कुनै दलबीच मेल हुने अवस्था नरहेको उनले बताए । उनले वैदेशिक सम्बन्धले गर्दा आन्तरिक अवस्था खराब भएको बताए ।
“एक, दुई, तीन गरेर हेर्नुभए हुन्छ । हरेकसँग सम्बन्ध बिग्रेर गयो । कुटनीतिमा एकातिर बिग्रियो । कुटनीतिमा बिग्रेपछि आर्थिक स्थिती बिग्रिहाल्छ नि π”, छिमेकी मुलुक भारतसँग पनि लिपुलेक, लिम्पियाधुरा र कालापानीको सीमाका विषयमा छलफल हुन नसकेको उनले जोडे ।
पूर्वमन्त्री पाण्डेले पछिल्लो राष्ट्रपतिको कदममा उपराष्ट्रपतिले वक्तव्यबाजी गर्ने विषयमा असन्तुष्टि पोखे । राष्ट्रपति र उपराष्ट्रपतिबीच झगडा छ भन्ने कुराले राम्रो सन्देश नगएको उनको भनाइ छ । यस विषयमा देशको उच्च पदस्थ व्यक्तित्वले आन्तरिकरुपमा समाधानको पहल गर्नुपर्नेमा उनले जेड दिए ।
प्रतिक्रिया दिनुहोस्