काठमाडौं, २० भदौ । गाउँ, शहर र दुनियाँ ब्युँझाउने अभियानका साथ १४ वर्षको अनवरत यात्रा पार गर्दै एबीसी टेलिभिजनले १५ औं वर्षको शुभारम्भ गरेको छ । यस अवसरमा एबीसी न्यूजले विभिन्न क्षेत्रका व्यक्तित्वहरुसँग संवाद एवम् सुझाव संकलन गरेको छ । नागरिकको लामो संघर्ष र योगदान पश्चात् देशमा प्राप्त परिवर्तनका लागि नागरिक आन्दोलन, जनवादी सर्जक, स्रष्टा र कलाकारहरुको पनि महत्वपूर्ण योगदान छ । यसै सन्दर्भमा देउडा गायक नन्दकृष्ण जोशीसँग एबीसीकर्मी ध्रुव अधिकारीले गरेको संवादमा आधारिक आलेखः

लोकप्रिय देउडा गायक नन्दकृष्ण जोशी देश र समाज रुपान्तरणमा योगदान गर्ने सर्जकका लागि नीति बनाउनुपर्ने माग राख्छन् । उनले एबीसी टेलिजिनलाई शुभकामना दिदै भने, “एबीसी टेलिभिजनले स्थापनाकालदेखि सञ्चार जगतमा उदाहरणीय काम गरेको कुरा निवेदन गर्न चाहन्छु, अहिले म जन्मेको ठाउँ बझाङमा छु, यहीबाट हार्दिक शुभकामना दिन चाहन्छु ।”

जोशीले लोकतान्त्रिक आन्दोलनको जग बसाल्ने काममा नागरिक आन्दोलन सशक्तरुपमा नउभिएको भए, २०६२/६३ को जनआन्द्योलन सफल हुन नसक्ने बताउनुभयो ।त्यो बेला पार्टीहरु शुसुप्त अवस्थामा रहेकाले जनताले विशवस मान्न सक्ने अवस्था थिएन, पार्टीको काम जनताले मानेका थिएनन् । उनले भने, “कृष्ण पहाडी, श्याम श्रेष्ठ, अर्जुन पराजुली, देवेन्द्र पाण्डे सुरुसुरुमा हामीले जति काम ग¥यौं, यसले विस्तारै काठमाडौंमा मात्रै उचाइ लिएको थिएन, यो मेचीदेखि महाकालीसम्म पुगेको थियो ।

तर, त्यो समय तात्कालीन सरकारले सुरक्षा दिने कुनै कुरा नभएपनि देशका कुनै पनि पार्टीले सकारात्मक दृष्टिकोण पनि नराखेको उनले बताए ।

एबीसी टेलिभिजनले जति गरेको छ, यो अझै नपुगेको तर, अहिलेसम्म गरेको काम सराहनीय भएको सुझाव दिदै उनले सर्जकका लागि नीति बनाउने कुरा कांग्रेस नेता गिरिजाप्रसाद कोइराला र माओवादी केन्द्रका अध्यक्ष पुष्पकमल दाहाल प्रचण्ड समक्ष राखेको पनि स्मरण गरे ।

आगामी निर्वाचनको सन्दर्भमा नेताहरुको बानी देखेर मेचीदेखि महाकालीसम्माका जनता वाक्क भएको उनले बताए । उनले उनी निकट पार्टी नेपाली कांग्रेसले आफूलाई कुन अवगुण देखेर टिकट नदिएको भन्दै प्रश्न समेत गरें ।

जोशीले भने, “२०४२ सालको सत्याग्रहमा जेल परेको छु । २०४६ देखि लोकतन्त्रको आन्दोलनमा निरन्तर छु । मेरो लागि भनेको होइन, म जस्ता लाखौं युवा पाखा लागेका छौं । हाम्रो पिढींले दुख पायौं । विरक्त भएर कोही कोरिया, कोही खाँडी मुलुक गएका छन् । धनकुटा, इलाम, कर्णालीको हुम्ला, जुम्ला जता दिएपनि म जितेर आउन सक्छु । कति यिनीहरुको झोला बोक्ने ? लोकतन्त्रको झोला बोक्छु तर, अन्याय र अत्याचारविरुद्ध म लडिरहन्छु ।

उनले आफ्ना नातागोता, आफन्तलाई टिकट दिने तर आन्दोलनमा योगदान दिएकालाई टिकट नदिने प्रवृत्तिप्रति खेद समेत प्रकट गरे ।