भक्तपुर, ५ माघ । नेकपा एमालेका नेता तथा भक्तपुर क्षेत्र नम्बर २ बाट निर्वाचित सांसद महेश बस्नेतले सरकारले जनमतविपरीत प्रदेश राजधानी र प्रदेश प्रमुख तोकेको आरोप लगाएका छन् ।

टेक मिडिया हाउसले भक्तपुरमा आयोजना गरेको कार्यक्रममा उहाँले प्रदेश नम्बर ३ को राजधानी भक्तपुर उपयुक्त हुँदाहुँदै सरकारले हेटौंडा तोकेकोमा आपत्ति जनाए ।

३ नम्बर प्रदेशका सबै नागरिकका निम्ति भक्तपुर केन्द्रमा पर्ने र आवश्यक पूर्वाधार समेत रहेकाले प्रदेश राजधानी भक्तपुर बनउनुपर्ने उनले बताए । राप्रपा अध्यक्ष कमल थापाको राजनीति रक्षाको लागि सरकारले हेटौंडालाई प्रदेश राजधानी तोकेको बस्नेतको आरोप छ । सरकारद्धारा गठित कार्यदलको सुझाव विपरीत प्रदेश राजधानी हेटौंडा तोकिनु गलत भएको उनले बताए ।

बस्नेतले प्रश्न गरे रसुवादेखि सिन्धुलीसम्मका नागरिक र जनप्रतिनिधिलाई हेटौंडा कसरी पायक पर्छ ? चितवनबाट (आपतकालिन अवस्थामा) जहाजमार्फत २० मिनेटमै काठमाडौं आउन सकिने उनले बताए ।

सबै हिसाबले प्रदेश राजधानी भक्तपुर नै उपयुक्त हुने बस्नेतले दाबी गरे । निर्वाचनपछि कामचलाउको हैसियतमा रहेको सरकारले जथाभावी नियुक्ति र निर्णय गरेकोमा पनि सांसद बस्नेतले आपत्ति जनाए । कार्यक्रममा आयोजक टेक मिडया हाउसले बस्नेतलगायत भक्तपुरका नवनिर्वाचित सांसदलाई सम्मान गरेको थियो ।