काठमाडौं, १७ असार । नेपाल विद्युत् प्राधिकरणले करिब ६ महिनापछि काठमाडौंमा विद्युतको पोल हटाउन सुरु गर्ने भएको छ । काठमाडौंमा भूमिगत वितरणलाइन बिछ्याइरहेको प्राधिकरणले ओभरहेड वितरणलाइन हटाउने गरी काम गर्न लागेको हो ।
प्राधिकरणका कार्यकारी निर्देशक कुलमान घिसिङले पोल हटाएपछि त्यसमा राखिएका इन्टरनेटको तार पनि हटाउनुपर्ने बताउनुभयो । इन्टरनेट सेवा प्रदायक, नेपाल दूरसञ्चार प्राधिकरणसहित विद्युत् प्राधिकरण समेतको सहभागितामा काठमाडौंमा भएको कार्यक्रममा बोल्दै घिसिङले भूमिगत विद्युत् वितरणलाइनसँगै राखिएको फाइबर डक्ट प्रयोग गर्ने तयारी थाल्न सेवा प्रदायकलाई आग्रह गर्नुभयो ।
उहाँले विद्युत् पोल भाडाबारे थप विवाद गर्न नहुने बताउनुभयो । सबै मिलेर समस्याको समाधान गर्नुपर्ने भन्दै घिसिङले सेवा प्रदायकसँग बसेर भाडा विषयमा उत्पन्न विवाद सुल्झाउन प्राधिरकण तयार रहेको बताउनुभयो ।
घिसिङले अब विद्युत् प्राधिरकण दूरसञ्चार पूर्वाधार कम्पनीको लाइसेन्स लिन पनि तयार भएको बताउनुभयो । त्यसका लागि तयारी भइरहेको भन्दै उनले आफूहरुको लागि दूरसञ्चार सेवाको पूर्वाधारको व्यापार ज्यादै न्यून हिस्सा मात्रै भएको बताउनुभयो ।
‘हामीले सेवाकै लागि हाम्रो पोल, ओपीजीडब्लू केबल लगायतका पूर्वाधार दूरसञ्चार सेवाकै सहजताको काम गरिरहेका हौं, पूर्वाधारहरु सहप्रयोगले सहरमा तारको गुजुल्टो कम होस् भनेर नै हामीले भाडा बढाएका थियौं,’ उहाँले भन्नुभयो , ‘अब सबैले दूरसञ्चार पूर्वाधारको सहप्रयोग गर्ने समय आइसकेको छ ।’
प्रतिक्रिया दिनुहोस्