काठमाडौँ, ११ असार । नेकपा एकीकृत समाजवादीका अध्यक्ष माधवकुमार नेपालले सरकारले जनतालाई कष्ट हुनेगरि कुनै पनि वस्तुको मूल्यवृद्धि गर्न नहुने बताउनुभएको छ ।

काठमाडौंमा बसेको केन्द्रीय कमिटी बैठकलाई सम्बोधन गर्दै आज उहाँले यस्तो बताउनुभएको हो । उहाँले पाँच दलबीच भएको सहमतिलाई सरकारले छिट्टै पालना गर्ने विश्वास समेत व्यक्त गर्नुभयो । अध्यक्ष नेपालले बजार अनुगमन गरेर कालाबजारी गर्नेहरुलाई पनि कारबाही गर्न सरकारलाई सचेत गराइएको बताउनुभयो । उहाँले भन्नुभयो, ‘तेलको भाउ बढ्यो । मूल्यवृद्धि अचाक्ली भयो । त्यसैगरी भ्रष्टिकरण व्यापक रुपमा बढयो । हामीले यसमा पटक पटक कुरा उठायौं । यसै सन्दर्भमा प्रधानमन्त्रीले पाँच दलको बैठक बोलाउनुभएको थियो । र, त्यसमा मूल्यवृद्धिको सन्दर्भमा अनि तेलको मूल्य निर्धारण गर्ने सन्दर्भमा छलफल भयो ।

छलफल भएर हामीले कसरी राज्यले मुनाफा कमाउने होईन । यसमा जनतालाई मर्का नपर्नेगरी र राष्ट्रले पनि थेग्न सक्ने गरी अधिकतम हिसावले तेलको मूल्य घटाउने बारेमा शनिबार छलफल भएको छ । मलाई विश्वास छ आजको त्यो निर्णयलाई सरकारले तुरुन्त पालना गर्नेछ । हामीले हेर्ने भनेको हाम्रो छिमेकी देशमा मूल्य कस्तो छ ? र, त्यो मूल्य हेर्नुका साथसाथै हामी कतिसम्म जान सक्दछौं ? अन्य स्रोतहरु खोजेर भएपनि जनतालाई भार पर्नेगरी, जनतामा कष्ट पुर्याउने गरी राजस्व उठाउँदै हिँडन्, कदहरु बढाउँदै हिँडने काम गर्ने पनि होईन । मूल्यवृद्धि बढेको छ भने कालोबजारी गर्नेलाई कारबाही गर्नुपर्छ । सुपथ मूल्य पसल खोलेर विपन्न वर्गका समूदायलाई राहत दिनुपर्छ भनेर राखिएको छ । भ्रष्टिकरणका विषयमा पनि कुरा गरिएको छ ।’

मुलुकलाई भ्रष्टिकरणको बाटोमा जान नदिन पनि सरकारलाई आफूहरुले दवाव दिने काम गरिरहेको नेकपा एकीकृत समाजवादीका अध्यक्ष माधवकुमार नेपालले बताउनुभयो ।