काठमाडौं, २ माघ । विराटनगर बाहिरी चक्रपथको निमार्णले अझै गति लिन सकेको छैन । चक्रपथ निर्माणको योजना अघि सारेको २० बर्ष वितिसकेको छ तर निर्माणाधीन चक्रपथ भने फुटबल चौर र गौचरणमा परिणत भएको छ ।

सरकार र स्थानियबिच मुआब्जा विवाद उत्सर्गमा पुगेपछि निर्माणमा समस्या आएको हो ।
चक्रपथ निर्माणका लागि मुआब्जा नदिई जग्गा अधिग्रहण गर्न खोजेपछि विवाद उब्जिएको थियो । सोही कारण झोराहाट, दरैया र केशलिया क्षेत्रमा ट्रयाक र पक्की पुल निर्माण हुन सकेको छैन भने झोराहाटका बासिन्दाले मुआब्जा माग गर्दै अदालतमा मुद्धा दायर गरेका छन् । त्यस्तै रानीबाट पश्चिमी क्षेत्रमा पनि मुआब्जा विवाद छ ।

सरकारले चित्तबुझ्दो मुआब्जा नदिई जग्गाधनीलाई मर्का पार्ने गरी चक्रपथ विस्तार गरेकोे स्थानियको गुनासो छ ।

चक्रपथका लागि चाहिने दुई सय ११ बिघा जमिन सरकारले जग्गाधनीबाट निःशुल्क प्राप्ती गरेको छ । मुआव्जा नदिए पनि जग्गाधनीहरुलाई शोधभर्ना उपलब्ध गराउने सरकारी योजना छ । तर, केही स्थानमा स्थानीयले विरोध जनाउँदै मुआव्जाको माग गरेपछि निर्माणमा अवरोध सिर्जना भएको छ ।

शहरी विकास तथा भवन निर्माण डिभिजन प्रमुख श्यामकिशोर सिंहको अनुसार चक्रपथ निर्माणमा ढिलासुस्ती हुनुमा मुआब्जाको कारणमात्र नभई अन्य कारण पनि रहेको छ । सिंहका अनुसार रानी पश्चिममा तीन वटा घर र पुरानो सलाई फ्याक्ट्रीका साथै प्रादेशिक प्रहरी कार्यालयको पर्खालका कारण सडक स्तरोन्नती रोकिएको हो । प्रहरीले पर्खाल भत्काए पनि सलाई फ्याक्ट्रीले अदालतमा मुद्दा दायर गरेकाले काम अगाडि बढाउन नसकिएको सिंहको भनाई छ ।

विराटनगरमा बढ्दो सवारी चापलाई मध्यनजर गर्दै चक्रपथको योजना अघि सारिएको थियो । जम्मा ४२ किलोमिटरको उक्त सडक योजनामा हालसम्म ३५ किमिको ट्रयाक तयार भएको छ भने बाँकी सात किलोमिटर खनिएकै छैन ।

सडकखण्ड निर्माणका लागि आर्थिक वर्ष २०७०र७१ मा १४ करोड ५७ लाख ४० हजार रुपैयाँ बजेट आएको थियो भने २०७१र७२ मा ६ करोड ८७ लाख रुपैयाँ आएको थियो । यस्तै, आव २०७२र७३ मा पनि पाँच करोड ६१ लाख रुपैयाँ आएको थियो । तर, काम हुन नसकेकाले अधिकांश रकम फ्रिज हुने गरेको छ ।