काठमाडौं, २० जेठ । अफगानिस्तानमा तालिवान सत्तामा आएको झन्डै दस महिनापछि भारतले पहिलोपटक तालिवान सरकारसँग औपचारिक कूटनीतिक सम्बन्ध बढाएको छ ।अफगानी जनताका लागि खाद्यान्न र औषधिलगायतका सामग्री पठाएर तालिवान सररकारसँग आफूलाई ‘इन्गेज’ राखिरहेको भारतले पहिलोपटक आफ्ना अधिकारीलाई काबुल पठाएको हो । भारतीय विदेश मन्त्रालयले एक विज्ञप्ति जारी गर्दै मन्त्रालयका संयुक्त सचिव ९पीएआई० जेपी सिंहको नेतृत्वमा अधिकारीहरूको टोली अफगानिस्तान पठाएको जनाएको छ ।टोलीले भारतले अफगानिस्तानलाई उपलब्ध गराएको मानवीय सहायताको निरीक्षण गर्ने तथा अफगानिस्तान सरकारलाई सहयोग पुर्याइरहेका विदेशी संघसंस्थासँग भेटघाट गर्ने बताइएको छ । सम्भव भएसम्म भारतले गरेको सहयोग परिचालन भएका स्थानसम्म टोली पुग्ने मन्त्रालयले जनाएको छ । त्यसका साथै, भारतले उपलब्ध गराएको मानवीय सहायताका सन्दर्भमा पनि अधिकारीहरूले तालिवान सरकारसँग कुराकानी गर्ने विज्ञप्तिमा उल्लेख छ ।भारतले अहिलेसम्म आफगानिस्तानका लागि २० हजार मेट्रिक टन गहुँ, १३ टन औषधि, ५ लाख कोभिडविरुद्धको खोप तथा कपडालगायतका सामग्री सहयोग गरिसकेको छ । तालिवानले गत अगस्ट १५ मा अफगानिस्तानको सत्ता कब्जा गरेको हो । अमेरिकी सेनाले अफगानिस्तान छाडेलगत्तै तालिवानले बन्दुकको आडमा शासन सत्ता नियन्त्रणमा लिएको थियो ।
तालिवान समूह पाकिस्तानसँग निकट रहेको र आतंकवादी गतिविधिमा संलग्न रहेको भारतको बुझाइ छ । जसका कारण तालिवान सरकारमा आएसँगै भारतले आफ्ना नागरिक फिर्ता ल्याउनुका साथै दूतावास हटाएको थियो ।
तर पछिल्लो समय तालिवान सरकारसँग सम्बन्ध विस्तार गर्नका लागि भारत सक्रिय हुन थालेको हो । सिंहको नेतृत्वमा काबुल पुगेको भारतीय टोलीले गर्ने भेटवार्ता तालिवान नेताहरूसँगको पहिलो औपचारिक वार्ता हुनेछ । यसअघि अनौपचारिक रूपमा भने भारतले विभिन्न सम्पर्कमार्फत तालिवान नेतासँग कुराकानी गर्दै आएको थियो ।
प्रतिक्रिया दिनुहोस्