काठमाडौं , २ माघ । सातवटै प्रदेशका प्रमुख तोक्ने तयारीमा रहेका प्रधानमन्त्री शेरबहादुर देउवाले मंगलबार विहान एमाले र माओवादीका नेताहरुसँग छलफल गर्दैछन् । छलफलपछि दिउँसो मन्त्रिपरिषद बैठक बोलाइएको छ ।

देउवाले आजै पार्टीका शीर्ष नेताहरुसँग पनि परामर्श गर्ने तयारी गरेको उनको निजी सचिवालयले जनाएको छ । एमाले–माओवादीसँग छलफलपछि मंगलबार दिउँसो चार बजे मन्त्रिपरिषद बैठक बस्ने तय भएको र सम्भवत आजकै बैठकबाट प्रदेश प्रमुख तथा प्रदेशको अस्थायी सम्पर्क कार्यालय खोल्ने निर्णय हुने स्रोतको दावी ।

प्रधानमन्त्री देउवाका स्वकीय सचिव भानु देउवाले भने, ‘प्रदेश प्रमुख र प्रदेशको अस्थायी कार्यालय तोक्ने सबै तयारी पूरा भएको छ ।’

सरकारले प्रदेश प्रमुख नतोकिँदा निर्वाचन आयोगले प्रदेशसभातर्फको समानुपातिक तर्फको निर्वाचन परिणाम बुझाउन पाएको छैन भने यसकै कारण राष्ट्रियसभा निर्वाचनमा पनि ढिलाइ भइरहेको छ । आज र भोलीमा प्रदेश प्रमुख नतोक्ने हो भने राष्ट्रिय सभाको निर्वाचन समेत प्रभावित हुनसक्ने चेतावनी समेत दिएको छ ।