काठमाडौँ, १६ चैत । रुसले शान्ति वार्ताका क्रममा गरेको वाचा विपरित आक्रमण जारी राखेको युक्रेनले आरोप लगाएको छ ।
युक्रेनको चेर्निहिभ क्षेत्रका गभर्नरले त्यहाँ सैन्य गतिविधि कम गर्ने वाचा गरेपनि रुसले आफ्नो आक्रमणमा कुनै परिवर्तन नगरेको बताएका छन । गभर्नर भिचास्लाभ चाउसले टेलिग्राम म्यासेजिङ एपमा रुसले आफ्नो वाचा पूरा नगरेको भन्दै निन्दा गरेको अन्तराष्ट्रिय सञ्चारमाध्यमले जनाएका छन् ।

गभर्नर चाउसका अनुसार रुसले चेर्नीहिभ क्षेत्रमा रातभर बमबारी गरेकोथियो । रुसले राजधानीबाट आफ्नो फौज फिर्ता गर्ने प्रतिबद्धता गरेको केही घण्टापछि बुधबार सबेरसम्म पनि किभमा हवाई गस्तिका साइरनहरू सुनिएको बताइएको छ । टर्कीको इस्तानबुलमा भएको शान्ति वार्तापछि रुसले मङ्गलवार उत्तरी युक्रेनको किएभ र चेर्नीहिभ क्षेत्रहरूमा आफ्नो सैनिक गतिविधिलाई ठूलो मात्रामा कटौती गर्ने प्रतिबद्धता जनाएको थियो । यद्यपी, रुसी अधिकारीहरूले युक्रेन लगायत पश्चिमा देशहरुले रुसी प्रतिविद्धतालाई संशयका साथ हेरेका छन् । तीन घण्टा लामो वार्ताका क्रममा रुसका उपरक्षामन्त्री एलेक्जेन्डर फोमिङले आपसी विश्वास बढाउनका लागि सैन्य गतिविधि धेरै मात्रामा कटौती गर्न लागिएको बताएका थिए। युक्रेनले रुसका सामु प्रस्तुत गरेका विकल्पहरूमा युक्रेनले सुरक्षाको प्रत्याभूतिका बदलामा तटस्थ भूमिका अपनाउने प्रस्ताव गरेका थिए ।

युक्रेनका राष्ट्रपति भोलोदिमीर जेलेन्सकीले वार्ताका प्रारम्भिक सङ्केतहरू सकारात्मक भएतापनि रुसले आफ्नो आक्रमणलाई जारी राखेको निन्दा गर्नुभएको छ । रुस आक्रमणको मुख्य उद्देश्य युक्रेनलाई नेटो गठबन्धनमा सदस्य हुनबाट रोक्नु रहेको अनुमान गरिएको छ । यता रुसी अधिकारीहरुले पनि वार्ता व्यवहारिक चरणमा प्रवेश गरेको प्रतिक्रिया दिएका छन् ।