काठमाडौँ, २ चैत । आर्थिक वर्ष २०७९/८० को बजेट निर्माणको गृहकार्यमा अर्थ मन्त्रालय लागिसकेको छ । संवैधानिक व्यवस्था अनुुसार जेठ १५ मा बजेट ल्याउन पाँच सदस्यीय बजेट मस्यौदा लेखन समिति निर्माण गरी मन्त्रालयले तयारी थालेको हो । कोभिड महामारीले थलापरेको अर्थतन्त्र तङ्ग्रीन नपाउँदै सात समुद्र पारीको युक्रेन र रुसबीचको युद्धको बाछिटा नेपालमा पनि देखिन थालेको छ ।

आगामी आर्थिक वर्षका लागि सिद्धान्त र प्राथमिकता निर्धारण गर्दै बजेटको मस्यौदा तयारीमा समिति जुटेको मन्त्रालयका प्रवक्ता ढुण्डीराज निरौलाले जानकारी दिनुभयो । विषयगत मन्त्रालय र क्षेत्रसँग क्रमशः छलफल गर्दै गइरहेको उहाँले बताउनुभयो । चालु आर्थिक बर्षको बजेट महिना वित्दा सम्म प्रभावकारी परिचालन हुन सकेको छैन । उसमाथि पछिल्लो समय मुलुकका समष्टिगत आर्थिक सूचक चुनौतीपूर्ण बन्दै गएका छन् । बढ्दो व्यापार घाटा, घट्दो रेमिट्यान्स, विदेशी मुद्रा संचितिमा देखिएको संकुचन लगायतका अवस्थालाई ध्यानमा राखी आगामी वर्षको बजेट निर्माणमा लाग्नुपर्ने अर्थविद्को सुझाव छ ।

वर्षभरी खर्च हुन नसकी पछिल्ला दुई तीन महिनामा मात्र पूँजीगत बजेट सक्ने प्रवृत्तिमा यस वर्ष पनि सुधार आउन सकेको छैन । खर्च गर्ने प्रणाली नै परिवर्तन गर्नुपर्ने अवस्था आएको पूर्व अर्थसचिव रामेश्वर खनाल बताउनुहुन्छ । अर्थतन्त्रलाई सन्तुलनमा राख्न बजेट निर्माणदेखि कार्यान्वयनको ठूलो भूमिका रहने भएकाले यसमा संलग्न सबै पक्ष सजग रहनुपर्नेमा सरोकारवालाहरूले जोड दिएका छन् ।