काठमाडौं, १५ फागुन । नेकपा एमालेले प्रतिनिधिसभा बैठक अवरोधलाई आज पनि निरन्तरता दिने भएको छ । एमाले संसदीय दलका उपनेता सुवास नेम्वाङले प्रतिनिधिसभा बैठक अवरोधलाई निरन्तरता दिने बताएका हुन् । उनले एमसीसीबारे सत्तारुढ दलले ‘व्याख्यात्मक घोषणा’सहित पारित गर्ने तयारी गरेकोमा त्यसबारे भने अहिले नै कुनै टिप्पणी नगर्ने बताए । ‘एक नम्बर हाम्रो संसदमा आन्दोलन जुन छ, त्यो जारी रहन्छ ।’ नेम्वाङको भनाइ छ .
उनले सत्तापक्षले वा गठबन्धनले एमसीसीबारे के गर्छ त्यो कुरा अझै प्रस्ट नभएको पनि बताए । ‘चर्चा हल्ला विभिन्न छन् । एमसीसीबारे आज उहाँहरुले व्याख्यात्मक टिप्पणी गर्नुभएछ भने गरिसकेपछि भनौँला । अहिले किन नभन्ने भन्दा यी साथीहरुको केही ठेगान छैन ।’
उनले गठबन्धनका निर्णय एकएक मिनेटमा परिवर्तन भइरहने दावी समेत गरे । आइतबार बिहान बसेको सत्तारुढ दलको बैठकले एमसीसीबारे व्याख्यात्मक टिप्पणीसहित अनुमोदन गर्ने निर्णय गरेको थियो । यसअघि लामो समयसम्म सत्तारुढ दलका नेताहरूबाट एमसीसीबारे फरकफरक मत सार्वजनिक भएको थियो ।