रुपन्देही । देवदह मगर संघले देवदहमा बृहत सांस्कृतिक महोत्सव गर्ने भएको छ । शनिबार देवदहमा पत्रकार सम्मेलन गर्दै संघले माघ १ गते मगर समुदायको मुख्य सांस्कृतिक तथा मौलिक पर्व भएको जनाउँदै देवदहमा तेस्रो सांस्कृतिक महोत्सव गर्ने घोंषणा गरेको हो । नेपाल बहुजाति, बहुभाषिक, बहुधार्मिक एवम बहुसांस्कृतिक विविधताले सजिएको देश भएको उल्लेख गर्दै मगर समुदायको संस्कृतिको रक्षा र विकासका लागि सांस्कृतिक महोत्सव गर्न लागिएको संघका अध्यक्ष शोभाकुमारी थापा मगरले बताउनुभयो  ।

महोत्सवलाई व्यवस्थित रुपमा सम्पन्न गर्न संघका कोषाध्यक्ष मिलन मास्की रानाको संयोजकत्वमा मुल आयोजक समिती बनाईएको छ । त्यसैगरी प्रेम थापा मगरको संयोजकत्वमा सांस्कृतिक उप-समिती, भुवन खासुमगरको संयोजकत्वमा खेलकुद उपसमिति, ताराबहादुर थापामगरको संयोजकत्वमा स्टल व्यवस्थापन उपसमिति गठन गरिएको संघले जनाएको छ । पत्रकार सम्मेलनमा बोल्दै मुल समिती संयोजक रानाले २०७५ देखि  निरन्तर हुँदै आएको महोत्सव गत दुई वर्ष कोभिडका कारण रोकिएको भए पनि यो पटक भने स्वास्थ्य मापदण्ड अपनाएर गरिने बताउनुभयो ।

महोत्सवमा राष्ट्रिय तथा स्थानीय कलाकारको प्रस्तुतिका साथमा मगर जातिको संस्कार झल्किने सोरठी, सालैजो, घाटु, ठाडो भाका जस्ता मौलिक गीत र नृत्यको अवलोकन गर्न सकिने सांस्कृतिक उपसमिति संयोजक प्रेम थापाले बताउनुभयो  । त्यसैगरी महोत्सवमा छेलो फाल्ने, घैटो फुटाल्ने र तीन खुट्टे दौड लगायतका खेलको मज्जा लिंदै मगर समुदायका परिकारहरू सेल रोटि,  खिचडी, तरुल बटुक तथा पोर्क मिटको स्वाद लिन सकिने आयोजकले जनाएको छ ।

तेस्तै देवदहमा सांस्कृतिक महोत्सवकै क्रममा लिगलिगे दौडको आयोजना गरिने देवदह मगर संघले जनाएको छ । देवदहका १२ वटै वडाका मगर समुदायका युवा युवतीको विचमा प्रतिस्पर्धा हुने र एक जना विजेता छानिने खेलकुद संयोजक भुवन खासुले बताउनुभयो ।  तीन किलोमीटरको दुरीमा हुने उक्त दौडमा प्रथम हुनेलाई एक वर्षको लागि लिगलिगे प्रमुख घोषणा गरिने र अर्को वर्ष साविक विजेता पुनः प्रतिस्पर्धामा जान नचाहेमा वा पुनः विजेता नभएमा मगर संघको झण्डा नयाँ विजेतालाई हस्तान्तरण गर्ने सांस्कृतिक उपसमिति संयोजक प्रेम थापाले बताउनुभयो   ।