वीरगञ्ज । शुक्रवार बिहान २ घण्टाको अवधिमा ९ जनामा कोरोना भाइरस संक्रमण पुष्टि भएको छ । वीरगञ्जको ईनर्वामा शुक्रवार बिहान ८ बजेदेखि १० बजेसम्मको अवधिमा सय जनाको एन्टिजेन परीक्षण गर्दा ९ जनामा संक्रमण पुष्टि भएको हो । संक्रमण पुष्टि भएका सबै भारतीय नागरिक रहेका छन् । ३५ देखि ६० वर्ष उमेर समूहका रहेको ईनर्वास्थित हेल्थ डेस्क इन्चार्ज डा. अनिषा महतोले बताउनुभयो ।
डा. महतोका अनुसार सबै जना घुम्ने र बेलुका फर्किने अभिप्रायले नेपाल प्रवेश गर्न लागेका थिए । कोभिड पुष्टि भएका ९ जनाले कोरोना भाइरसविरुद्धको खोप लगाइसकेका थिए । खोप लगाएपछि संक्रमण हुँदैन भन्ने भ्रम नपाली स्वास्थ्य सतर्कता अपनाउन पनि डा. महतोले आग्रह गर्नुभएको छ ।
यसअघि बिहीवार ३ सय ६० जनाको परीक्षण गर्दा ६ जनामा संक्रमण पुष्टि भएको थियो । काठमाडौँ, नवलपुर, चितवनका १/१ जना र ३ जना भारतीय गरी ६ जनामा संक्रमण पुष्टि भएको थियो । दैनिक औसतमा साढे ४ सय जनासम्मको परीक्षण हुने गरेको छ ।
संक्रमण पुष्टि भएकाहरूमा लक्षण देखिएको छैन । उनीहरूलाई होम आइसोलेट गर्ने गरी परिवारसँग समन्वय गरेर गाडी रिजर्भ गरी पठाउने गरिएको डा. महतोले बताउनुभयो ।
हेल्थ डेस्कमा अहिले १२ जना कर्मचारी कार्यरत छन् । उनीहरुले पालैपालो गरेर समय विभाजन गरी काम गरिरहेका छन् । भने कर्मचारीको लागि खानेपानीको अभाव र शौचालयको समस्या रहेको डा. महतोको भनाई छ ।
प्रतिक्रिया दिनुहोस्