काठमाडौं । गण्डकी प्रदेशका युवा तथा खेलकुद मन्त्री राजीव गुरुङ दीपक मनाङे को सम्पत्ति विवरण नबुझाएको विषय संसदसम्म पुगेको छ । प्रदेश सभाको शून्य समयमा बोल्ने सांसदले मन्त्री मनाङेको सम्पत्तिका बारेमा चासो व्यक्त गर्नुभयो ।

करिव २ महिना पछि सुरु भएको गण्डकी प्रदेशसभामा बोल्दै नेकपा एमालेका सांसद कृष्णबहादुर थापाले सम्पत्ति विवरण नबुझाउनुको कारणबारे मन्त्री गुरुङले सभामुख मार्फत संसदमा जानकारी गराउन माग गर्नुभयो । शून्य समयमा बोल्दै उहांले भन्नुभयो , ‘राजकीय पदमा जाने कोहीले पनि दुई महिनाभित्र सम्पत्ति विवरण सार्वजनिक गर्नुपर्ने व्यवस्था छ, हाम्रो गण्डकी प्रदेशका युवा तथा खेलकुद मन्त्री ज्यूले २०७८ भदौ २७ मा मिडियामा जनाइएअनुसार नबुझाएको र युवालाई लगानी गरेकाले पैसा आउन बाँकी रहेको भन्नुभएकाले यसको वास्तविकता सभामुखमार्फत संसदलाई जानकारी गराइदिनु हुन आग्रह गर्दछु ।’

आइतबार युवा तथा खेलकुद मन्त्रालयले आयोजना गरेको पत्रकार सम्मेलनमा मन्त्री मनाङेले आफु सँग के छ के छैन भन्नेमा आफै कन्फ्युज रहेको बताएका थिए । भने सम्पती पनि साथीभाइहरुले लगेर फिर्ता नदिएको जनाएका थिए ।