पर्वत, २८ साउन
पर्वतको कुश्मा बजार स्थित दुर्लुङचोक नजिकै लामो समयदेखि होटल व्यवसाय सञ्चालन गर्दै आएका व्यवसायी गजेन्द्र तुलाचन विहिबार विहानदेखि सम्पर्कविहिन भएका छन् । मुस्ताङ स्थायी घर भई कुश्मामा मुस्ताङ गेष्ट हाउस सञ्चालन गरी बस्ने तुलाचन विहिबार राति सम्म सम्पर्कमा आउन सकेका छैनन् । केही महिनादेखि मधुमेह, उच्चरक्तचाप लगायतका रोगबाट ग्रसित तुलाचन दैनिकजसो मर्निङवाक गर्न निस्किने क्रममा विहिबार विहान ६ बजे घरबाट निस्किएको परिवारका सदस्यहरुले जानकारी दिएका छन् । सँधै जसो मर्निङवाकमा निस्किएपनि विहिबार विहान अबेर सम्म नफर्केपछि परिवारले खोजिकार्यमा सहयोग गर्न जिल्ला प्रहरी कार्यालय पर्वतमा उजुरी दिएका थिए । तुलाचनका आफन्त महेन्द्र तुलाचनले खोजिकार्यमा सहयोग गर्न प्रहरीलाई निवेदन दिएपछि बेपत्ता गजेन्द्र तुलाचनको मोबाइल लोकेसन पर्वतको कुश्मा नगरपालिका १ पाङ सम्म देखाएपनि त्यसपछि मोबाइल अफ भएका कारण थप खोजिकार्य भइरहेको प्रहरीले जनाएको छ ।
तुलाचनका आफन्तहरुले खोजिकार्यमा सहयोग गरिदिन सामाजिक सञ्जाल मार्फत सहयोगको याचना गरेका छन् । परिवारका सदस्यहरुले उनलाई कहिकतै जुनसुकै अवस्थामा देखेपनि जानकारी गराउन ९८१६६५०५७३ र ९८४६१५३३४१ मा जानकारी गराउन अनुरोध गरेका छन् ।