काठमाडौँ, ३ असार ।  विश्वमै महामारीको रूप लिएको कोरोना भाइरसको सङ्क्रमण ब्राजिलमा बढ्दै गइरहेको छ । तर भारतमा भने छट्दै छ ।

ब्राजिलमा पछिल्लो २४ घण्टाभित्र ८५ हजार आठ सय ६१ जना नयाँ सङ्क्रमित थपिएका छन् । ब्राजिलमा नयाँ थपिएको सङ्क्रमित सङ्ख्या विश्वका अन्य मुलुकमा एकै दिन थपिएका बिरामीभन्दा धेरै हो ।

कोरोना महामारी नियन्त्रणमा केही सफलता प्राप्त गरिरहेको ब्राजिलमा पछिल्लो समय फेरि सङ्क्रमण बढ्न थालेको छ । महामारी उत्कर्षमा पुग्दा एकै दिन एक लाख हाराहारीमा नयाँ बिरामी थपिने गरेका थिए ।

नियन्त्रणका क्रममा दैनिक ३० हजार हाराहारीमा झरेको सङ्क्रमण फेरि बढ्न थालेको हो । दैनिक ८५ हजारभन्दा बढीलाई सङ्क्रमण पुष्टि हुन थालेको छ ।

ब्राजिलमा हालसम्म एक करोड ७६ लाख २९ हजार सात सय १४ जनामा सङ्क्रमण पुष्टि भइसकेको छ । सङ्क्रमितमध्ये एक करोड ६० लाख ३० हजार छ सय एक जना उपचारपछि निको हुँदै डिस्चार्ज भइसकेका छन् ।

एकै दिन ८५ हजार नौ सय ५५ जना बिरामी निको भए । ११ लाख पाँच हजार दुई सय ७६ जनाको उपचार जारी रहेकोमा आठ हजार तीन सय १८ जनाको अवस्था चिन्ताजनक छ ।

ब्राजिलमा मृत्यु हुने सङ्क्रमितको सङ्ख्या पनि बढेको छ । पछिल्लो २४ घण्टाभित्र दुई हजार छ सय ७३ जनाको मृत्यु कोरोनाका कारण भयो । यो सङ्ख्या अन्य मुलुकमा मृत्यु भएका सङ्क्रमितको भन्दा अत्याधिक धेरै हो ।

ब्राजिलमा कोरोना महामारी चरम विन्दुमा पुग्दा एकै दिन तीन हजारभन्दा बढी सङ्क्रमितको मृत्यु हुने गरेको थियो । त्यो सङ्ख्या घटेर क्रमस एक हजार पाँच सयभन्दा तल झरिसकेको अवस्थामा फेरि दैनिक मृत्यु हुने सङ्क्रमितको सङ्ख्या बढिरहेको हो ।

ब्राजिलमा हालसम्म कोरोनाका कारण चार लाख ९३ हजार आठ सय ३७ जनाको मृत्यु भइसकेको छ । कोरोना सङ्क्रमितको मृत्यु हुनेमा ब्राजिल विश्वकै दोस्रो नम्बरमा छ । तर सङ्क्रमित सङ्ख्याको हिसाबमा भने ब्राजिल कोरोनाबाट प्रभावित हुनेमध्ये विश्वकै तेस्रो नम्बरमा रहेको मुलुक हो ।

छिमेकी मुलुक भारतमा सङ्क्रमण घट्दै गइरहेको छ । दैनिक ७० हजारभन्दा तल नयाँ बिरामी थपिने गरेका छन् । यसअघि कोरोना महामारी उत्कर्षमा पुग्दा एक दिनमा चार लाखसम्म नयाँ बिरामी थपिए ।

त्यो सङ्ख्या क्रमस घट्दै ७० हजारभन्दा तल झरेको हो । पछिल्लो २४ घण्टामा भारतमा ६७ हजार एक सय चार जना नयाँ बिरामी थपिएका छन् । विश्वमा ब्राजिलपछि भारतमा नयाँ बिरामी धेरै थपिएका हुन् ।

भारतमा सङ्क्रमित सङ्ख्या दुई करोड ९६ लाख ९९ हजार तीन सय ६५ पुगेको छ । दुई करोड ८४ लाख ८३ हजार आठ सय ५६ जना सङ्क्रमणमुक्त बनेका छन् ।

एकै दिन एक लाख तीन हजार दुई सय २२ जना निको भए । आठ लाख ३३ हजार पाँच सय ७८ जना उपचाररत रहेकोमा आठ हजार नौ सय ४४ जनाको अवस्था गम्भीर छ ।

भारतमा पछिल्लो २४ घण्टामा एक हजार चार सय ११ जनाको मृत्यु कोरोनाका कारण भयो । हालसम्म तीन लाख ८१ हजार नौ सय ३१ जना सङ्क्रमितको मृत्यु भारतमा भइसकेको छ ।

कोरोनाका कारण धेरै नागरिक गुमाउनेमा भारत विश्वकै तेस्रो नम्बरमा रहेको मुलुक हो । सङ्क्रमित सङ्ख्याको हिसाबमा भने दोस्रो नम्बरमा छ ।

हालसम्म कोरोनाका कारण सबैभन्दा बढी प्रभावित बनेको मुलुक अमेरिका हो । विश्वका विभिन्न मुलुकमध्ये अमेरिकामा हालसम्म सबैभन्दा धेरैलाई कोरोना पुष्टि भएको छ । मृत्यु हुने सङ्क्रमितको सङ्ख्या पनि अमेरिकामै धेरै छ ।

तर पछिल्लो समय अमेरिकाले कोरोना नियन्त्रणमा उल्लेख्य सफलता प्राप्त गरेको छ । एकै दिन १२ हजार पाँच सय ७६ जना नयाँ बिरामी थपिए ।

महामारीले नराम्ररी प्रभावित भएका समय अमेरिकामा दैनिक एक लाख हाराहारीमा नयाँ बिरामी थपिने गरेका थिए । हालसम्म तीन करोड ४३ लाख ६४ हजार नौ सय १५ जना अमेरिकी नागरिकमा कोरोना पुष्टि भइसकेको छ ।

दुई करोड ८६ लाख १५ हजार तीन सय ६६ जना उपचारपछि कोरोनामुक्त हुँदै सामान्य जीवनमा फर्किएका छन् । एकै दिन ३६ हजार छ सय ६५ जना निको भए ।

५१ लाख ३३ हजार चार सय २१ जना उपचाररत रहेकोमा चार हजार तीन सय १९ जनाको अवस्था चिन्ताजनक छ । अमेरिकामा दैनिक मृत्यु हुने सङ्क्रमितको सङ्ख्या पनि कम हुँदै गइरहेको छ ।

केही समयअघिसम्म दैनिक दुई हजारभन्दा बढीको मृत्यु भइरहेको अमेरिकामा एकै दिन चार सय छ जनाको मृत्यु कोरोनाका कारण भयो । हालसम्म विश्वकै सबैभन्दा धेरै छ लाख १६ हजार एक सय २८ जना सङ्क्रमितको मृत्यु अमेरिकामा भइसकेको छ ।

विश्वमा पछिल्लो २४ घण्टामा तीन लाख ८१ हजार ५६ जना नयाँ बिरामी थपिए । महामारी उत्कर्षमा पुगेका बेला दैनिक सात लाखभन्दा बढी नयाँ बिरामी थपिन्थे । विश्वमा सङ्क्रमित सङ्ख्या १७ करोड ७७ लाख ८० हजार आठ सय ७० पुगेको छ ।

१६ करोड २२ लाख ७८ हजार एक सय ८८ जना उपचारपछि कोरोनामुक्त बनिसकेका छन् । एकै दिन चार लाख ४६ हजार चार सय आठ जना निको भएर डिस्चार्ज हुँदै सामान्य जीवनमा फर्किएका छन् ।

एक करोड १६ लाख ५४ हजार सात सय २० जनाको उपचार भइरहेकोमा ८३ हजार ७० जनाको अवस्था गम्भीर छ । विश्वमा दैनिक मृत्यु हुने सङ्क्रमित सङ्ख्या पनि घट्दै छ ।

एकै दिनमा १४ हजारभन्दा बढी सङ्क्रमितको मृत्यु हुने गरेकोमा २४ घण्टाभित्र आठ हजार नौ सय आठ जनाको मृत्यु कोरोनाका कारण भयो । हालसम्म विश्वमा ३८ लाख ४७ हजार नौ सय ६२ जना सङ्क्रमितको मृत्यु भइसकेको छ ।