काठमाडौँ, २१ जेठ निशेधाज्ञाको समयमा एक महिना सम्म अत्यावश्यक सामग्री विक्रि वितरण गर्दै आएका पर्वतका १ सय ३१ जना व्यवसायीहरुको कोरोना परिक्षण गरिएकोमा जम्मा पाच जनामा कोरोना पुष्टि भएकोले कुस्ममा संक्रमण घटेको अनुमान गर्न थालिएको छ ।

कोरोना महामारीको दोश्रो लहर सँगै बन्दाबन्दीको अवस्था सिर्जना भएपछि पर्वत जिल्ला पनि करिव एक महिना ठप्प बन्यो । यस बीचमा सवारी साधन होटल व्यवसाय दैनिक उपभोग्य सामग्रीका पसल तथा व्यवसायहरु पनि बन्द नै रहे । यसरी बन्द गरिएपनि अत्यावश्यक सामग्री विक्रि वितरण गर्ने व्यवसायीहरु दैनिक दुई घण्टा मात्रै सञ्चालनमा ल्याउने गरी निषेधाज्ञा जारी गरिएको थियो । कठिन परिबेशमा व्यवसाय सञ्चालनमा ल्याउँदा व्यवसायीहरुको अवस्था कस्तो रह्यो भन्ने बारे जानकारी लिन कोरोना परिक्षण गरिएको बताइएको छ ।
पर्वतका अन्य स्थानीय तहहरुले सम्बन्धित पालिकामा नै व्यवसायीहरुको कोरोना परिक्षण गरेपनि कुश्मा बजारमा भने पर्वत उद्योग बाणिज्य संघको सक्रियतामा व्यवसायीको कोरोना परिक्षण गरिएको हो । विहिबार गरिएको कोरोना परिक्षणका क्रममा १ सय ३१ जना व्यवसायीहरुको स्वाब संकलन गरी परिक्षण गरिएको थियो । परिक्षणका क्रममा ५ जनामा मात्रै संक्रमण पुष्टि भएको थियो । रिपोर्ट आएपछि भोलिका दिनमा कसरी अघि बढ्ने भन्ने कुराको निक्र्यौल गर्न सकिएको र पर्वतको व्यवसायलाई विस्तारै सञ्चालनमा ल्याउने तयारी गरिएको पर्वत उद्योग बाणिज्य संघका अध्यक्ष गोपी अधिकारीले बताउनुभयो ।
जिल्ला प्रशासन कार्यालय पर्वतले कोभिड व्यवस्थापन समितिको अनुरोधमा जेठ २२ गते राति सम्मका लागि पर्वत जिल्लामा निषेधाज्ञा जारी गरेको छ । लामो समयसम्म व्यवसाय बन्द हुँदा व्यवसायीहरुलाई असहज परिस्थिति सिर्जना भएको गुनासो आएपछि २२ गते पछिका दिनमा निषेधाज्ञाको नियम परिवर्तन गर्ने योजनाका साथ व्यवसायीहरुको कोरोना परिक्षण गरिएको हो । अत्यावश्यक उपभोग्य सामग्री विक्रि वितरण गर्ने व्यवसायीहरुको स्वास्थ्य अवस्थाबारे जानकारी लिन गरिएको कोरोना परिक्षणको व्यवस्था बारे खुशी हुँदै कुश्मा बजारका व्यवसायी डासिराम शर्माले पर्वत उद्योग बाणिज्य संघलाई धन्यवाद दिनुभयो ।
पर्वतमा दोश्रो लहरमा मात्रै हाल सम्म १२ सय ९१ जनामा संक्रमण पुष्टि भएको छ भने ४४ जनाको संक्रमणकै कारण मृत्यु भइसकेको छ । केही दिन यतादेखि पर्वतमा संक्रमण र मृत्यु हुनेको संख्यात्मक दर घट्दो क्रममा छ । यद्यपि छिमेकी जिल्ला कास्की र बागलुङमा संक्रमणदर उच्च विन्दुमा नै रहेका कारण निषेधाज्ञा पुणर् रुपमा हटाउने पक्षमा भने जिल्ला प्रशासन कार्यालय देखिएको छैन । बैंक तथा वित्तिय संस्थाहरु र व्यवसायलाई स्वास्थ्य मापदण्ड अप्नाएर सञ्चालन गर्न दिनुपर्ने व्यवसायीहरुको माग रहेको छ ।