काठमाडौं, २७ बैशाख ।   आज बैशाख २७ गते दिउँसो १ बजे प्रतिनिधि सभा बैठक बस्दैछ । बैठकमा प्रधानमन्त्री केपी शर्मा ओलीले आज विश्वासको मत लिने तयारी गर्नुभको छ । सोमबार बस्ने प्रतिनिधि सभा बैठकमा प्रधानमन्त्री ओलीले विश्वासको मतका लागि प्रस्ताव लैजान लाग्नु भएको छ । प्रधानमन्त्रीले विश्वासको मत लिन खोजेपछि सरकारको सिफारिसमा राष्ट्रपतिले संसदको अधिवेशन आह्वान गर्नुभएको हो । यसैबीच आइतबार कार्यव्यवस्था परामर्श समितिको बैठक बसेको थियो। सभामुख अग्निप्रसाद सापकोटाले राखेको उक्त बैठकले कोरोना संक्रमण भएका सांसदलाई पनि मतदानको व्यवस्थापन गर्न सकिने निर्णय गरेको छ।

प्रधानमन्त्री ओलीलाई विश्वासको मत जुटाउन गाह्रो हुने देखिएको छ। नेकपा एमालेले ह्वीप जारी गर्दै सबै सांसदलाई प्रधानमन्त्री ओलीका पक्षमा मतदान गर्न भनेको छ। तर एमालेभित्र विवाद उत्कर्षमा पुगेकोले माधव नेपाल पक्षका सांसदले मतदान गर्छन् कि गर्दैनन् त्यो भने हेर्न बाँकी छ । नेता नेपाल पक्षले आज बिहान ९ बजेसम्म प्रधानमन्त्री ओलीलाई आफूहरूका माग सम्बोधन गर्न समय दिएका छन्। गत फागुन २८ का निर्णयबाट पछि हट्दै ओली २०७५ जेठ २ को अवस्थामा पार्टीलाई पुर्‍याएर क्रियाशील बनाउनुपर्ने पक्षमा नेपाल पक्ष छ।

यसैबीच नेता नेपालले ६ बुँदे पत्र लेख्दै आफूहरूले उठाएका माग पूरा नभए सामूहिक राजीनामा दिने बताउनुभएको छ । साथै प्रमुख प्रतिपक्षी नेपाली कांग्रेस, नेकपा माओवादी केन्द्रले ओलीलाई विश्वासको मत नदिने बताएको छ । जनता समाजवादी पार्टीले ह्वीप जारी नगर्ने बताएको छ । संसदमा नेकपा एमालेका १२१ सांसद छन्। ओलीलाई बहुमत पुर्‍याउन १३६ सांसद चाहिन्छ। यस्तै कांग्रेसका दुई निलम्बितसहित ६३, नेकपा माओवादी केन्द्रका ४९, जसपाका दुई निलम्बितसहित ३४ सांसद संसदमा छन्।