बाँके, १५ बैशाख । पछिल्लो समय कोरोनाको हटस्पट बनेको बाँके जिल्लाको भेरी अस्पतालमा कार्यरत ७० बढी स्वास्थ्यकर्मीलाई कोरोना संक्रमण भएको छ । स्वास्थ्यकर्मीनै संक्रमितभएपछि अस्पतालको दैनीक सेवामा गम्भिर असर परेको छ । अस्पतालसँग नियमित काममा रहेका ४०० कर्मचारी मध्य बिहिबार सम्म ७५ जनामा कोरोना संक्रमण पुष्टि भएको अस्पतालले जनाएको हो ।

जनशक्तिको अभावका कारण कोरोना संक्रमण पुष्टि भएर पनि गम्भिर अवस्था नभएका स्वास्थ्यकर्मीहरुलाई स्वास्थ्य सुरक्षा सामाग्री उपलब्ध गराएर काममा लगाईएको छ । लक्षण देखिएका कर्मचारीहरु आधाआधी होम आइसोलेसन र अस्पतालमा क्वाटर लिएका स्वास्थ्यकर्मीहरु कोठामा नै आइसोलेट भएका छन् । अस्पतालको जुनियर लेवलका कर्मचारीहरुलाई भने अस्पतालमा भर्ना गरेर उपचार गराईएको अस्पताल प्रशासनले जनाएको छ ।अस्पतालका अनुसार नर्सिङ तर्फ ३२ जना, मेडिकल अफिर ८ जना, कार्यालय सहयोगीहरु १६जना, एचए, अहेव ८ जना, एक्सरे १ जना, मेडिकल रेकर्डर १ जना तथा अन्य ९ जना कर्मचारीहरुमा कोरोना पुष्टि भएको हो ।अस्पतालमा जनशक्तिको अभाव भएको भन्दै जनशक्ति माग गरिएकोमा स्वास्थ्य तथा जनसंख्या मन्त्रालयले दरबन्दी स्विकृत दिइसकेको छ । अस्पताल प्रशासनले ७० बढी जनशक्तिको आवश्यकताका लागि बिज्ञापन समेत खोलिसकेको छ ।