काठमाडौं, १५ वैशाख । भारतमा कोरोना भाइरसको संक्रमण दर झनै तीब्र बन्दै गैरहेको छ । पछिल्लो २४ घण्टामा ३ लाख ६२ हजार ९०२ जना नयाँ संक्रमित थपिएका छन । यो अहिलेसम्म दैनिक थपिएका संक्रमितको संख्या सबैभन्दा धेरै हो। एक साता यता दैनिक तीन लाख संक्रमित थपिँदै आएका छन्।
भारतमा हालसम्म कुल संक्रमितको संख्या १ करोड ७९ लाख ८८ हजार ६ सय नाघेको छ । कोरोना संक्रमणका कारण पछिल्लो २४ घण्टामा भारतमा तीन हजार २८५ जनाले ज्यान गुमाएका छन । जसअनुसार हालसम्म मृत्यु हुनेको कुल संख्या २ लाख १ हजार १ सय नाघेको छ ।
कोरोना महामारी देखिएयता पहिलो पटक भारतमा एकै दिन तीन हजारभन्दा बढीको मृत्यु भएको हो। पछिल्लो एक साता यता दैनिक दुई हजारभन्दा बढीले ज्यान गुमाउँदै आएका थिए।
भारतमा सक्रिय संक्रमितको संख्या २९ लाख ७९ हजार ७६८ पुगेको वर्ल्डोमिटरले जनाएको छ। पछिल्लो २४ घण्टामा भारतका १५ राज्यमा १० हजारभन्दा बढी संक्रमित थपिएका छन्। सबैभन्दा बढी महाराष्ट्रमा ६६ हजार ३६८ संक्रमित थपिएका छन्।
त्यस्तै, उत्तर प्रदेश, केरला र कर्नाटकमा ३० हजारभन्दा बढी संक्रमित थपिएका छन्। पश्चिम बंगालमा १६ हजार ४०३, तलिमनाडुमा १५ हजार ८३०, गुजरातमा १४ हजार ३५२ र उत्तराखण्डमा ५ हजार ७०३ संक्रमित थपिएका छन्।
नेपालसँग सीमा जोडिएका उत्तर प्रदेश, पश्चिम बंगाल, बिहार र उत्तराखण्ड पनि सबैभन्दा बढी संक्रमण फैलिएका राज्यहरुमा पर्दछन ।
प्रतिक्रिया दिनुहोस्