काठमांडौ, चैत ११ । शेयर कारोबारमा एकाएक सुधार आएको छ । शेयरको माग बढ्दा अधिकांस कम्पनीको शेयर मूल्य बढेको छ । कारोबारमा आएका जलविद्युत बाहेक सबै समूहको सूचक बढेपछि समग्र नेप्से ४१ दशमलव ३० अंकले बढेर २५ सय ७० दशमलव २५ विन्दुमा उक्लिएको छ । आज २०८ कम्पनीको ६ अर्ब ६७ करोड बढीको शेयर किनबेच भएको छ । बैंकहरुमा तरलता बढ्न थालेपछि अन्तरबैंक ब्याजदर पुनः घटेर १ प्रतिशतभन्दा तल झरेको छ । एक साता अघिसम्म अन्तर बैंक ब्याजदर ४ प्रतिशत माथि थियो । राष्ट्र बैंकका अनुसार अहिले बैंकिङ्ग प्रणालीमा ५९ अर्ब तरलता रहेको छ । केन्द्रिय बैंकले पुनरकर्जा वापतको रकम समेत बैंकहरुमा पठाउदा तरलता सहज बनेको हो । पछिल्लो एक सातामा बैंक तथा वित्तीय संस्थाहरुले १० अर्ब रुपैयाँ पुनरकर्जा लगेका छन भने स्वीकृत भएको झण्डै ३० अर्ब रकम लग्न बाँकी रहेको छ । साथै नेप्सेले नागरिक स्टक डिलर कम्पनीले कारोबार गर्ने योग्य संस्थाहरुको सूची प्रकाशित गरेपछि स्टक डिलर कम्पनी औपचारिक रुपमा बजार लागेको आभाषले पनि लगानीकर्ताको मनोबल उकासिएको छ । जसले गर्दा शेयर खरिदको क्रम बढ्दा समग्र सूचकमा सुधार आएको हो ।