काठमाडौं, १ पुस । प्रतिनिधिसभा र प्रदेशसभाको समानुपातिकतर्फको मतगणना आज साँझसम्म सकिने निर्वाचन आयोगले जनाएको छ ।

निर्वाचन आयोगका प्रवक्ता नवराज ढकालले समानुपातिकतर्फको गणना द्रूत गतिमा भइरहेको जानकारी दिंदै शनिबार साँझसम्म सबैतिरको गणना सकिने बताउनुभयो । आयोगले प्रदेश तथा प्रतिनिधिसभाको समानुपातिकतर्फको मतगणना शुक्रबार नै सकिने जनाए पनि गणनाको अन्तिम परिणाम थाहा पाउन शनिबार सा“झसम्म कुर्नुपर्ने भएको छ । सुनसरी र सर्लाहीको जिल्लाको गणना बाँकी रहेपछि समानुपातिकतर्फको अन्तिम परिणाम आउन ढिलाइ भएको हो । प्रदेश तथा प्रतिनिधिसभाको प्रत्यक्षतर्फको गणना भने आयोगले बुधबार नै सकाएको थियो ।

निर्वाचन आयोगको सूचना प्रणाली व्यवस्थापन शाखाका अनुसार एमालेले ३१ लाख ३० हजार ४२९, नेपाली कांग्रेसले ३० लाख ६८ हजार ३२४, नेकपा माओवादी केन्द्रले १२ लाख ७४ हजार ५४४ र संघीय समाजवादी फोरमले नेपालले ४ लाख ५९ हजार ५९९ मत प्राप्त गरेका छन् । त्यस्तै, राष्ट्रिय जनता पार्टी नेपालले ४ लाख ४७ हजार ८७९, विवेकशील साझा पार्टीले २ लाख ११ हजार ५१४ र राष्ट्रिय प्रजातन्त्र पार्टीले १ लाख ९३ हजार ९५५ मत प्राप्त गरेको आयोगले जनाएको छ ।