काठमाडौं, १८ पुस । निर्वाचन आयोगले नेकपाका दुवै पक्षलाई शुक्रबार पत्राचार गरेर उनीहरूले गरेको पत्रका विषयमा थप स्पष्ट पार्न भनेको छ । आयोगले केपी शर्मा ओली र पुष्पकमल दाहाललाई अध्यक्ष सम्बोधन गर्दै अलग–अलग प्रकृतिको पत्र लेखेको छ । प्रचण्ड–माधवकुमार नेपाल पक्षलाई आधिकारिकताको मागदाबी गर्नका लागि कानुनी प्रक्रिया पूरा गरेर निवेदन दिन भनिएको छ । ओली पक्षलाई भने आयोगले विवरण अद्यावधिकका लागि बुझाइएको पत्रमा स्पष्ट पार्न भनेको छ ।

नेपाल कम्युनिष्ट पार्टी (नेकपा) को वैधानिकता र सूर्य चुनाव चिन्ह दाबी गरेका नेकपाका विभाजित दुवै पक्षलाई निर्वाचन आयोगले त्यसबारे पत्राचार गरेको हो। शुक्रबार दुवै पक्षलाई पत्र लेखी त्यसबारे पत्राचार गरेको प्रमुख निर्वाचन आयुक्त दिनेश थपलियाले बताउनुभयो । ‘पार्टीको वैधानिकताका सम्बन्धमा दुवै पक्षलाई पत्र पठाएका छौं,’ प्रमुख आयुक्त थपलियाले भन्नुभयो । सत्तारुढ नेकपा विभाजनको क्रममा गएपछि प्रधानमन्त्री केपी शर्मा ओली नेतृत्वको पक्ष र प्रचण्ड–नेपाल नेतृत्वको नेकपा दुवैले आफूहरु आधिकारिक नेकपा भएको दाबी गरेका छन्। अध्यक्ष पुष्पकमल दाहाल प्रचण्ड र अर्का अध्यक्ष माधवकुमार नेपालले नेतृत्व गरेको पक्षले बहुमत केन्द्रीय सदस्यको हस्ताक्षरसहित निर्वाचन आयोगमा गई आफूहरु नै मूल पार्टी भएको हुँदा पार्टीको नाम र चुनाव चिन्ह सूर्य आफूहरुसँग हुनुपर्ने दाबी गरेको छ। सो विषय टुंगो लगाउने क्रममा आयोगले शुक्रबार दुवै पक्षलाई पत्राचार गरेको थपलियाले बताउनुभयो ।