एमबी आस्था
पोखरा, २७ साउन ।  गण्डकी प्रदेशका मुख्यमन्त्री पृथ्वीसुब्बा गुरुङले कोरोना भाइरस भन्दा पनि बढी पार्टीभित्रको भाइरसले दुःख दिएको टिप्पणी गर्नुभएको छ ।

नेपाल आदिवासी जनजाति पत्रकार महासंघ (फोनिज), गण्डकी प्रदेशले फोनिजको २१ औं स्थापना दिवसका अवसरमा आयोजना गरेको “कञ्चन पत्रकारिता पुरस्कार अक्षयकोष” घोषणा तथा पुरस्कार वितरण कार्यक्रमलाई सम्बोधन गर्दै गुरुङले प्रदेश सरकार आफ्नै स्रोत साधनले कोरोना भाइरसविरुद्ध लडिरहेको बताउनुभयो ।

गण्डकी प्रदेशमा कोरोना महामारीविरुद्ध लकडाउन गर्नुपर्ने अवस्था अहिले नरहेको भन्दै मुख्यमन्त्री गुरुङले कोरोना नियन्त्रणमा जनता पनि आफैं सचेत हुनुपर्ने आवश्यकता औंल्याउनुभयो ।  उहाँले काठमाडौंपछि गण्डकी प्रदेश र पोखरामा पत्रकारिताको व्यवसायिक विकास भएको जनाउँदै पर्यटन, कला, साहित्य र संस्कृतिको राजधानी मात्र होेइन पत्रकारिताको समेत राजधानी बनाउन पत्रकारहरुले सहयोग गर्नुपर्ने धारणा व्यक्त गर्नुभयो ।

कार्यक्रममा आफ्ना दिवंगत आमा बुबा वेदमान गुभाजू र नेत्रकुमारी गुभाजूको स्मृतिमा व्यवसायी एवं समाजसेवी विमलमान गुभाजूले स्थापना गर्नुभएको कञ्चन पत्रकारिता पुरस्कार अक्षयकोषको घोषणा गरिएको थियो भने सो पुरस्कारबाट कास्कीका अग्रज पत्रकार रुद्रबहादुर थापा र बागलुङका अग्रज पत्रकार राजेशचन्द्र राजभण्डारीलाई मुख्यमन्त्री गुरुङले पुरस्कृत गर्नुभएको थियो ।

गण्डकी प्रदेशको आन्तरिक मामिला तथा कानून मन्त्रालयका सचिव केदारनाथ शर्मा, फोनिज, गण्डकी प्रदेशका इञ्चार्ज हुम गुरुङ, अध्यक्ष एमबी आस्था, महासचिव रुद्रबहादुर श्रीस, प्रतिभा छनौट समितिका संयोजक अधिवक्ता सुरेन्द्र थापामगर, पुरस्कृत व्यक्तित्वद्वय थापा र राजभण्डारी, नेपाल पत्रकार महासंघ, कास्कीका अध्यक्ष दीपेन्द्र श्रेष्ठलगायतले बोलेका थिए ।