टेकबहादुर सोडारी

कैलाली, १४ साउन । मंगलबार रातिदेखिको लगातार बर्षापछि कैलालीका अधिकांश क्षेत्र डुवानमा परेको छ । लगातारको वर्षाले सिँचाइ कुलाहरु भरिएर बस्तीमा पस्दा कैलालीको जानकी गाउँपालिकाका अधिकांश ठाउँ जलमग्न भएका छन् । नदी तथा कुलाको पानी गाउँ पसेपछि सयौँ घर डुवानमा परेका छन् । घरमा पानी पस्दा खाद्यान्न, अन्नपात भिजेर नष्ट भएको छ । जानकी–३, ७, ८, ९ का सयौँ घर डुवानमा परेको छ भने ‘‘कुला फुटेर बस्तीमा पस्दा सयाँै विघा खेतीयोग्य जमिनडुवान भएको छ । घरमा अन्नपात र लुगाकपडा भिजेको छ । केही बस्ती सानुपर्ने अवस्था आएको छ । हामीले प्रहरीलाई खबर गरेका छौँ ।’’

टीकापुर नगरपालिकाको वडा नं। ५ शाहीपुर, सिम्रेनी, वडा नं. ६ को बेलुवा बस्ती डुवानमा परेको छ । माथिल्लो तटको पानी बग्दै जाँदा यी क्षेत्रमा बाढीको खतरा बढेको छ । निरन्तर वर्षा भएपछि कर्णाली नदीमा निर्माण भएको तटबन्ध भत्कने जोखिम बढेको छ । लगातारको वर्षाका कारण टीकापुरको जमरा नदीमा पानीको वहाव बढेको छ । जमरा कुलामा पानी सहतभन्दा माथि पुगेपछि बस्तीमा बग्न थालेका छ । पानी बस्तीमा पसेपछि मुनुवास्थित किसान बिजबृद्धि कृषि सहकारी संस्थामा रहेको गहुँको बीउ र मौजाद मल भिजेर नष्ट भएको छ ।
टीकापुरमा रहेका सिँचाइ कुलाहरु भरिएपछि टीकापुरका सबैजसो बस्ती जलमग्न भएका छन् ।

कैलालीको भजनी र जोशीपुर क्षेत्र पनि डुवानमा परेको छ । भजनी र जोशीपुरमा पनि सयौं परिवार विस्थापित हुने अवस्था आएको छ । भजनी ३ र ७मा रहेका सयौँ घर डुवानमा परेपछि उनीहरुलाई उच्च स्थानमा सार्ने तयारी थालिएको छ ।

यसैगरी जोशीपुर गाउँपालिकाका अधिकांश वडा जलमग्न भएका छन् । कान्द्रा र काँडा नदी सतहभन्दा माथि पुगेपछि जोशीपुर– १,३,५,७ का अधिकांश बस्ती डुवानमा परेका छ । कैलालीका कर्णाली, मोहना, काडा, कान्द्रा, खुटिया लगायतका नदीहरुमा पानीको बहाव बढेकोले सर्तक रहन जल तथा मौसम विज्ञान विभागले आग्रह गरेको छ ।

रातभरिको वर्षापछि कैलालीमा विहानैबाट प्रहरी उद्दारमा खटेको छ । इलाका प्रहरी कार्यालय टीकापुरका प्रमुख मधुसुदन न्यौपानले जानकी गाउँपालिकाका केही नागरिकलाई बस्तीबाट सार्ने तयारी गरिएको बताउनुभयो । स्थानीय स्तरमा रहेका उच्च घर, सामुदायिक वन तथा विद्यालयमा सार्ने तयारी थालेका छौँ । जनप्रतिनिधि र स्थानीयको सहयोगमा प्रहरीमा उद्दारमा खटेका छन् ।