काठमाडौं, २३ जेठ । आज थप एक जनाको कोरोना संक्रमणबाट मृत्यु भएको छ । यो सगै नेपालमा कोरोनाबाट मृत्यु हुनेको संख्या ११ पुगेको छ ।
क्वारेन्टाइनमा १४ दिन बसेर घर फर्किएलगत्तै हिजो बिहान मृत्यु भएका सुर्खेतको पन्चपुरी नगरपालिका १ का २० वर्षीय युवकमा कोरोना संक्रमण पुष्टि भएको हो । सुर्खेत प्रादेशिक अस्पतालमा मृत्युपछि गरिएको थ्रोट स्वाब परीक्षणमा ती युवकमा कोरोना संक्रमण पुष्टि भएको अस्पतालका मेडिकल सुपरिटेन्डेन्ट डाक्टर डम्बरबहादुर खड्काले जानकारी दिनुभयो ।
मृत्युलगत्तै प्रादेशिक अस्पतालबाट स्वास्थ्यकर्मीहरूको टोली नमूना संकलन गर्न पन्चपुरी पुगेका थिए। त्यहाँबाट अपराह्न नमुना सुर्खेत ल्याएर मध्यरातमा परीक्षण गरिएको थियो। क्वारेन्टाइनमा १४ दिन बसेर दुईपटक आरडीटी किट परीक्षण रिपोर्ट नेगेटिभ देखिएपछि ती युवकलाई २१ जेठमा घर पठाइएको थियो। उनको हिजो बिहान मृत्यु भएको हो। पन्चपुरी नगरपालिका १ का अध्यक्ष धनबहादुर थापाले राति एक्कासी स्वास्थ्यमा समस्या आएको र लगत्तै युवकको मृत्यु भएको जानकारी दिनुभयो । “भारतको मुम्बईबाट आएपछि १४ दिन क्वारेन्टाइनमा बसेका थिए,” उनले भने, “कुनै लक्षण थिएन। आरडीटी परीक्षण गरेर रिपोर्ट नेगेटिभ आएपछि घर पठाइएको थियो।”
युवकसहित जनता मावि विद्यापुर क्वारेन्टाइनमा रहेका वडा नम्बर १ का ६ जनालाई २१ जेठ दिउँसो घर पठाइएको थियो। ७ जेठमा भारतको मुम्बईबाट आएका उनीहरूलाई १४ दिन क्वारेन्टाइनमा राखेर स्वास्थ्य परीक्षणपछि घर पठाइएको थियो। क्वारेन्टाइनमा बस्दासम्म त्यहाँ रहेका कुनै पनि व्यक्तिमा कोभिड–१९ को लक्षण नदेखिएको वडाध्यक्ष थापाले जानकारी दिनुभयो ।
प्रतिक्रिया दिनुहोस्