जनकपुर, १४ जेठ । नेपाल–भारत सीमानाका जटहीमा अलपत्र एक जनाको मृत्युु भएको छ । धनुषाको शहिदनगर नगरपालिकाका वडा नम्बर ९ स्थित गोठकोयलपुरका ३० वर्षीय युवकको मृत्यु भएको हो । भारतमा रोजगारी गुमेपछि जटही नाकामा आएका उनको खान समेत नपाएर कष्टकर जीवन जिउन पर्दा मृत्यु भएको दावीसहित नाकामा अलपत्र रहेका अन्य नेपालीहरुले प्रदर्शन गरेका छन् । घटनापछि नेपाल प्रवेश गरी उनीहरुले ज १ त १२१३ नम्बरको एम्बुलेन्समा समेत तोडफोड गरेका छन् । जटही नाकामा रहेको समय नेपाल सरकारले खानाको व्यवस्था नगरेको र खाना नपाएर एकजनाको मृृत्यु भएको उनीहरुको दावी छ । मृतकले अहमदावादमा होटलमा कुकको रुपमा काम गर्दै आएका थिए ।

परिवारका सदस्यहरूले राति नै एम्बुलेन्स लिएर पुगे तर प्रहरीले पारि जान दिएन । रातभर संघर्ष गरे पनि दाजुलाई भेट्न नपाएको र बिहान मृत्यु भएपछि सेनाले विधि प्रक्रियाअनुसार शव ल्याउने कुरा गरिरहेको मृतकका भाइ धीरेन्द्रले जनाएका छन् । जिल्ला प्रहरी प्रमुख एसपी बस्नेतले पनि घटनास्थलको मुचुल्का प्रहरीले उठाएको र गुरमैताको शव नेपाली सेनाले उपयुक्त विधि अनुसार पोस्टमार्टमका लागि प्रादेशिक अस्पतालमा ल्याउने तयारीमा रहेको जानकारी दिए । शवको स्वाब जाँचका लागि अस्पतालबाटै लिइने र पोस्टमार्टम रिपोर्ट आएपछि मात्रै मृत्युको कारण खुल्ने बस्नेतको भनाइ छ ।

गुरमैताको मृत्युपछि सीमामा दुई दिनदेखि थुनिएका अन्य युवाहरू नेपाल सरकार र प्रहरी प्रशासनविरुद्ध नाराबाजी गर्दै प्रहरीलाई ताकेर ढुंगामुढासमेत गरेका थिए । उनीहरूको चर्को विरोध र प्रदर्शनपछि सबैलाई सीमावारि ल्याएर सम्बन्धित पालिकाहरूमा पठाइएको प्रहरीले जनाएको छ । एसपी बस्नेतका अनुसार घटनापछि बुधबार मात्रै करिब तीन सयभन्दा बढी नेपाली जिल्ला प्रवेश गरेका छन् । मंगलबार पनि करिब साढे तीन सयजना सो नाकाबाट भित्रिएका थिए । पछिल्लो दुई सातामा धनुषामा मात्रै करिब दुई हजारजना प्रवेश गरिसकेका छन् । दिनहुँ भारतबाट आउने भिडलाई व्यवस्थापन गर्न प्रशासन र जनप्रतिनिधिलाई हम्मे परिरहेको छ ।