काठमाण्डौं, ११ मंसिर । देशको ऐतिहासिक प्रतिनिधीसभा र प्रदेशसभाको पहिलो चरणको निर्वाचन हिजो सम्पन्न भएको छ । देशको ३२ जिल्लामा सम्पन्न निर्वाचनमा स्थानीय तहको भन्दा ८ प्रतिशतले मत कम खसेको छ । स्थानीय तहको निर्वाचनमा कुल ७३ प्रतिशतको हाराहारीमा मत खसेको थियो भने हिजो भएको निर्वाचनमा औषतमा ६५ प्रतिशत मतदाताले मात्र मतदान गरेका छन् । चुनावमा सबैभन्दा बढी मत रसुवामा ८०.६९ प्रतिशत खसेको छ भने सबैभन्दा कम मत रोल्पामा ५५.१० प्रतिशत खसेको छ । स्थानीय तहको निर्वाचन सो जिल्लामा क्रमसः ८२ र ७० प्रतिशत मत खसेको थियो ।

यस्तै रुकुमको दुई मतदान केन्द्रको निर्वाचन रद्ध भएको छ । प्रदेश नं. ६ पश्चिम रुकुमको बाफिकोट गाउपालिकास्थित रत्न आधारभुत विद्यालय क मतदान केन्दमा प्रत्यक्षतर्फको २५० मत अज्ञात व्यक्तिले जलाईदिए पछि सो मतदान केन्द्रको चुनाव स्थगित भएको हो । रुकुमकै आठवीससकोट नगरपालीका ११ मा रहेको नेपाल राष्ट्रिय माध्यमिक विद्यालय मतदान केन्द्रमा पनि समानुपातिकतर्फको मतपेटिकामा एसिड खन्याए पछि समानुपातिकतर्फको चुनाव स्थगित भएको छ । स्थगित भएको प्रतिनिधिसभाको प्रत्यक्षतर्फको चुनाव पुन मंसिर २१ गते दोस्रो चरणको चुनावसंगै हुने भएको छ भने समानुपातिकतर्फको चुनाव कहिले गर्ने भन्ने निर्कौल भएको छैन ।

यता सिन्धुपाल्चोकमा निर्वाचनका दिन बामपन्थी गठबन्धन र कांग्रेस कार्यकर्तावीच झडप हुदा स्थितीलाई नियन्त्रण लिन प्रहरीले हवाइ फायर गर्नुपर्ेको थियो । सिन्धुपाल्चोक क्ष्ँेत्र नं. १ का दुइ मतदान केन्द्र देउराली प्राथमिक विधालय र कालीकादेवी प्राविको केन्द्रमा कार्यकर्ताहरु विच झपड भएको हो । झडपका बाबजुद मतदान सम्पन्न भएको छ भने सिन्धुपाल्चोक बाट कुल ६८.८७ प्रतिशत मत खसेको छ ।

यस्तै कांग्रेस- राप्रपाको लोकतान्त्रिक गठबन्धनले धादिङको खनियावास गाउँपालिका-४ झार्लाङमा रहेको मतदान केन्द्र कब्जा गर्ने प्रयास गर्यो भने
नेपाल विद्यार्थी संघका महामन्त्री कुन्दन काफ्लेको नेतृत्वमा दोलखाको तामाकोशी गाउँपालिका जफेमा रहेको जामुने बुथ कब्जा गर्ने प्रयास भयो ।

त्यस्तै सय वर्ष नाघेका मतदाताको सहभागिता पनि यस पटकको चुनावमा चर्चाको विषय बन्यो । बैतडीको सुनर्या गाउपालीकाको ढोल्या मतदान केन्द्रबाट मतदान गर्नुभएकी ११४ वर्षीय महिला पशुपति साउद मतदान गर्ने सबैभन्दा जेष्ठ मतदाता बन्नुभएको हो । त्यस्तै म्याग्दीको ज्ञानोदय मावि मतदान केन्द्रबाट ११२ वर्षका खड्कबहादुर भण्डारी ले, खोटाङको सरस्वती माबि (ख) केन्द्रबाट १०६ बर्षिय मणीसुन्दर बजिमयले र रसुवाको कालिका ३ का एक सय चार वर्ष उमेर पुगेका गौकुमारी लामिछाने ले सुन्धारा मावी मतदान केन्द्र बाट मतदान गर्नुभएको हो ।

अहिले खसेको मतपटेकालाई जिल्लाको सदरमुकाममा पुर्याउने कार्य जारी छ । कुल ३२ जिल्लाका २ हजार ९१७ मतदानस्थलमध्ये २ हजार ५७ मतदानस्थलका मतपेटिकाहरु सम्बन्धित जिल्लाका सदरमुकाममा पुर्याइएको छ भने भौगोलिक विकटतालगायत कारणले ८७० स्थानका मतपेटिका भने अझै सदरमुकाम पुर्याउन सकिएको छैन । यसै समयमा मतपेटिका ल्याउदै गरेका समुहलाई लक्षित गरि विभिन्न ठाउमा बम बिष्फोट भएको छ ।

उत्तरी भोजपुरको साल्पासिलिछो गाउँपालिका अन्तर्गतका वडाहरुको मतपेटिका सदरमुकामतर्फ ल्याउने क्रममा षडानन्द नगरपालिकाको न्याउले जंगलमा सुतली बम विस्फोट गराइएको छ । त्यस्तै जाजरकोटको कुशे गाउँपालिका–१ को मतपेटिका बोकेको टोलीलाई लक्षित गरी बम विस्फोट गराइएको छ । मतपेटिकाको सुरक्षा अहिले प्रमुख चुनौति बनेको छ ।