काठमाण्डौं, ११ मंसिर । निर्वाचन आयोगले पहिलो चरणअन्तर्गत ३२ जिल्लामा भएको प्रतिनिधिसभा र प्रदेशसभा निर्वाचनमा ६५ प्रतिशतभन्दा बढी मत खसेको जनाएको छ । निर्वाचन सकिएपछि निर्वाचन आयोगले गरेको पत्रकार सम्मेलनमा प्रमुख निर्वाचन आयुक्त डाक्टर अयोधीप्रसाद यादवले निर्वाचन ऐतिहासिक रुपमा सम्पन्न भएको बताउनुभयो । निर्वाचन आयोगले ६५ प्रतिशतभन्दा बढी मत खसेको जनाएको छ ।

प्रतिनिधिसभातर्फ ३७ र निर्वाचन क्षेत्र र प्रदेशसभाका लागि भएको ७४ निर्वाचान क्षेत्रमा छिटफुट घटनाबाहेक सबै मतदान केन्द्रमा शान्तिपूर्ण रुपमा निर्वाचन भएको आयोगले जनाएको छ ।
मतदान सम्पन्न भएका उच्च पहाडी र हिमाली ३२ जिल्लामध्ये बाजुरामा सबैभन्दा बढी ८० प्रतिशत मत खसेको यादवले बताउनुभयो । निर्वाचन आयोगले मतपत्रले भरिएका अधिकांश स्थानका मतपेटिका हिजो नै जिल्ला सदरमुकाम ल्याएको छ भने उच्च हिमाली र विकट क्षेत्रका मतपेटिका आज हेलिकोप्टरबाट सदरमुकाम ल्याइने तयारी आयोगले गरेको छ । पहिलो चरणमा निर्धारण गरिएका ४ हजार ४६५ मतदान केन्द्रमध्ये दुई मतदान केन्द्रको मतदान सरेको छ । रूकुमको बाफीकोटको काडास्थित रत्न माविको क केन्द्र र रूकुमकै आठवीसकोट ११ गत्तसैनास्थित नेपाल राष्ट्रिय माविको ख केन्द्रको मतदान पुनः हुने आयोगले जनाएको छ । अन्य स्थानमा मतदाताको उल्लेखिय सहभागितासहित मतदान सकिएको आयोगले जनाएको छ ।