हेटौडा , १० चैत । मकवानपुर प्रहरीले हिरा लुटपाटमा संलग्न ३ प्रहरी र एक पत्रकारलाई पक्राउ गरेको छ । पक्राउ पर्नेमा ललितपुर महानगरपालिकाको भैँसेपाटी बस्ने १९ वर्षीय सुजन आचार्य, सुर्खेतको वीरेन्द्रनगर १२ बस्ने २६ वर्षीय सुरेन्द्र बसेल, जाजरकोटको शिवालय २ बस्ने २७ वर्षीय वीरबहादुर बस्नेत र दाङको सिजुवा गाउँपालिका १ बस्ने २८ वर्षीय हिमकान्त पुन मगर पक्राउ परेको मकवानपुरका प्रहरी उपरीक्षक सुशीलसिंह राठौरले जानकारी दिनुभयो ।

उहाँका अनुसार पक्राउ परेका आचार्य पत्रकार हुन् भने अन्य प्रहरी रहेका छन् । उनिहरु मकवानपुरको कैलाश गाउँपालिका वडा नम्बर ५ चौकीटार गोगनेकी धनलक्ष्मी गुरूङको घरमा हिरा खरिद गर्ने बहानामा पुगेका उनीहरूले आइतबार साँझ हिरा लुटपाट गरेका थिए । लुटपाटको खबरपछि खटिएको इलाका प्रहरी कार्यालय पालुङको टोलीले उनीहरूलाई पक्राउ गरेको प्रहरी उपरीक्षक राठौरले जानकारी दिनुभयो ।

प्रहरीले उनीहरूको साथबाट हिरा एक थान, पेस्तोल एक थान, सञ्चार सेट ४ थान, क्यामरा १ थान, मेटल डिटेक्टर १ थान, मोबाइल ६ थान र ल्यापटप १ थान बरामद गरेको छ भने प्रहरीले लुटपाटमा प्रयोग भएको कार समेत नियन्त्रणमा लिएको छ । उनीहरूविरुद्ध चोरी तथा डाका मुद्दाअन्तर्गत अनुसन्धान अघि बढाइने मकवानपुरका प्रहरी उपरीक्षक सुशीलसिंह राठौरले बताउनुभयो ।