काठमाडौं, ९ मंसिर / शनिवार तेस्रो उद्योग दिवस भएपनि भोली आईतवार १० गते प्रतिनिधि र प्रदेश सभाको निर्वाचन भएकाले उधोग दिवस ओझेलमा परेको छ । चुनावका लागि उद्योगमन्त्री सुनिलबहादुर थापा गृहजिल्ला धनकुटामा रहेका तथा अरु कर्मचारी चुनावको लागि खटिएकाले दिवसको खासै कार्यक्रम छैन । वि.सं. १९९२ को मंसिर ९ गते उद्योग परिषद स्थापना भएको दिनको सम्झनामा २०७२ सालदेखि यो वर्षदेखि दिवस मनाउने निर्णय गरिए पनि त्यसो हुन सकेको छैन । २०७२ सालमा आएको भूकम्प र भारतीय नाकाबन्दीका कारण पहिलो उद्योग दिवस प्रभावकारी रुपमा मनाइएन । अघिल्लो वर्ष पनि उद्योगमन्त्री र उद्योगसचिव देशबाहिर हुदा बोलायका अतिथि पनि दिवसको कार्यक्रममा सहभागी भएनन् । यसपाली पनि चुनावका कारण दिवस औपचारिकता मै सिमित भएको छ ।

उद्योग दिवसको अवसरमा रोजगारी, राजश्व, स्वदेशी कच्चा पदार्थ प्रयोग तथा स्वदेशी वस्तु निर्यात हस्तकला तथा परम्परागत क्षेत्रकका व्यवसाय संचालन लगायतका विशिष्ट औद्योगिक व्यक्ति चयन गरि सम्मान गर्ने घोषणा समेत गरिएको थियो । तर घोषणा भएको तीन वर्षमा पनि कुनै उद्योगी सम्मानित भएका छैनन् । यसवर्ष पनि कुनै कार्यक्रम नभएको उद्योग मन्त्रालयले जनाएको छ । दिवसको अवसरमा उद्योग विभागले भने आफ्नो कार्यालय अगाडि सरसफाई कार्यक्रम गरेको छ ।