काठमाडौं, १९  माघ ।   चीनका प्रधानमन्त्री ली खछ्याङले युरोपेली युनियनसँग कोरोना भाइरसको उपचारका लागि सहयोग मागेका छन् । शनिबार उनले युरोपेली युनियनका सदस्य राष्ट्रसंघ अत्यावश्यक मेडिकल उपकरणका लागि सहयोग मागेका हुन् ।

कोरोना भाइरस चीनको सबै प्रान्तमा फैलिइसकेको छ। शनिबार बिहानसम्म चीनमा कोरोना भाइरसले मृत्यु हुनेको संख्या २५९ पुगेको छ। त्यस्तै ११ हजार ७ सय ९१ व्यक्तिमा कोरोना भाइरसको संक्रमण देखिएको छ।

चिनियाँ प्रशासनले कोरोना भाइरसको संक्रमण फैलिँदै गएपछि अत्यावश्यक काम बाहेक बाहिर ननिस्कन आफ्‍ना नागरिकलाई आग्रह गरेको छ।

हेबेईमा मात्र ५ लाखभन्दा बढी स्वास्थ्यकर्मी कोरोना भाइरस संक्रमितको उपचारमा लगातार खटिरहेका छन्। चौबीसै घन्‍टा खट्‍नुपर्दा थाकेको भन्दै बेइजिङबाट थप स्वास्थ्यकर्मी पठाइएको साउथ चाइना मोर्निङ पोेस्टले जनाएको छ। ब्याकअपका रुपमा चिनियाँ जनमुक्ति सेनाका चिकित्सक पनि तयारी अवस्थामा रहेको चीनले जानकारी दिएको छ।