भैरहवा, ११ पुस । अङ्ग्रेजी नयाँ वर्ष २०२० को पूर्वसध्यामा भैरहवामा रहेको होटल पौवामा नयाँ वर्ष विशेष कार्यक्रम हुने भएको छ ।

भैरहवामा पौवाले आज पत्रकार सम्मेलन आयोजना गरी नेपाल भ्रमण वर्ष २०२० को पूर्वसन्ध्यामा  न्यू इयर इभ २०२० विशेष कार्यक्रमको आयोजना गर्न लागेको जनाएको हो । होटल स्थापनाको वर्षदेखि नै विविध कार्यक्रमहरु गर्दैै आएको  पौवाले यस वर्ष राष्ट्रिय स्तरका ख्याति प्राप्त कलाकारहरुका साथमा कार्यक्रम गर्न लागको जनाएको छ । कार्यक्रममा सुगम संगीतका धरोहर गायक प्रमोद खरेल, गायीका टिका प्रसाईं, हास्य नायक राजा राजेन्द्र र स्थानीय कलाकारहरुको प्रस्तुति रहने होटल पौवाका महाप्रबन्धक विष्णु भण्डारीले बताउनुभयो ।

नेपाल भ्रमण वर्षमा विदेशी पर्यटकलाई होटल स्वागत गर्न आतुर रहेको बताउँदै विदेशी पर्यटकलाई नेपाली स्थानीय खानाका परिकार विशेष छुट्का साथ खुवाउने शुभओम कम्पनीका अध्यक्ष हरिबहादुर थापाले बताउनुभयो । ‘होटल पौवा : जहाँबाट आतिथ्यको सुरुवात हुन्छ’ मुलमन्त्र बोकेको होटल पौवाले विदेशी पाहुनालाई नेपाली आतिथ्यको न्यानोपन दिनुका साथै आफ्ना खानामा परिमार्जन गर्न लागेको समेत अध्यक्ष थापाले बताउनुभयो ।

होटल पौवाका महाप्रबन्धक विष्णु भण्डारीले नेपाली रैथाने खानालाई विदेशी पर्यटकमाझ लोकप्रिय बनाउँदै नेपाली खानाको अन्तराष्ट्रियकरण गर्ने अभियानमा लागेको बताउनुभयो । सुरुवाती चरणमा विभिन्न संस्कृतिलाई प्रतिनिधित्व गर्ने २० प्रकारका नेपाली रैथाने खाना हाम्रो मेनुमा समावेश गरेको बताउदै प्रदेश ५ सरकारले इतिहास बोकेको सुजता खीरलाई प्रदेशको चिनारीको रुपमा अघि सारेको महाप्रबन्धक भण्डारीले जानकारी गराउनुभयो ।

सुजता खीरलाई नियमित डेजर्टमा समावेश गर्ने र भ्रमण वर्ष २०२० को अवसरमा यस होटलबाट सेवा लिने सबै विदेशी पर्यटकलाई १० प्रतिशत छुटको व्यवस्था समेत गरिएको छ । होटल पौवाले प्रदेश नम्बर पाँचका पर्यटकीय सम्भावना बोकेका ठाउँमा शाखा खोलिसकेकोले यस आर्थिक वर्षमा पश्चिम क्षेत्रमा तीव्रताका साथ होटल सञ्चालनमा ल्याउने बताउँदै आगामी दस वर्ष भित्र होटल पौवाका देशव्यापी रुपमा १ सय शाखा खोल्ने तयारी रहेको पत्रकार सम्मेलनमा होटल पौवा प्रालीका प्रबन्ध निर्देशक विष्णुप्रसाद ज्ञवालीले बताउनुभयो ।