बझाङ,१० पुस । बझाङको सदरमुकाम चैनपुर र गोलाई जोड्ने पानकोट पुल निर्माण कार्यमा ढिलाइ भएको छ । साविकका ८ वटा गाविस जोड्ने स्टिल पुलको निर्माण कार्य रोकिएपछि स्थानीयमा पुल नबन्ने हो कि भन्ने चिन्ता छाएको छ ।

झण्डै ८ करोड रुपैयाँको लागतमा निर्माण हुन थालेको ६९ मिटर लम्बाईको पानकोट पुल निर्माणको जिम्मा ईलाईट कन्ट्रक्सनले लिएको थियो । निर्माण कम्पनीले २०७५ चैत्रमा सम्झौता गरी ०७७ बैशाखमा निर्माणसम्पन्न गरिसक्ने सम्झौता गरेपनि हालसम्म पुल निर्माणको कार्य अगाडि बढेको छैन ।

‘सम्झौता भएको १० महिना पुगिसक्दा समेत पुल निर्माणका सामाग्रीहरु आइपुगेको छैन,’ ‘स्थानीय चन्द्र सिंहले भने, ‘ठेकेदारले पुल निर्माण कार्यमा ढिलाई हुदा जनताले सास्ती भोग्नु परेको छ ।’ सेतीपारी जोड्ने सडक निर्माण भइसकेको तर सेती नदीमा पक्की पुलहरु निर्माणमा ढिलासुस्ती हुँदा सेतीपारीका बासिन्दाहरु यातायाताका सुविधाहरुबाट बञ्चित भएका छन् । पुल निर्माणको जिम्मा पाएको ईलाईट कन्ट्रक्सनका ठेकेदार योगेश पौडेलले भने, ‘निर्माण हुन लागेको पक्की पुलजस्तो स्टिल ब्रीज भएकाले समय लागेको बताए ।