काठमाडौं, ६ पुस । बाराको विश्रामपुर गाउँपालिकाका अध्यक्ष अमिरीलाल पाल पक्राउ परेका छन् । सवारी ज्यान मुद्धाका फरार प्रतिवादीको आरोपमा अध्यक्ष पाललाई आइतबार पक्राउ गरिएको बाराका प्रहरी उपरीक्षक विकासराज खनालले जानकारी दिनुभयो । पाललाई जिल्ला अदालत बाराले २०६३ सालको भदौ २९ गते सवारी ज्यानमुद्धामा २९ दिन कैद र २ हजार रुपैयाँ जरिवानाको फैसला सुनाएको थियो ।

यता नेकपा विप्लव समुहबाट अपहरणमा दैलेखको ठाटीकाँध गाउँपालिकाका अध्यक्ष धिरबहादुर शाहीको खोजी कार्य तीब्र बनाईएको छ।

नेपाल प्रहरी र सशस्त्र प्रहरी बलको संयुक्त टोलीले अपहरित अध्यक्षको खोजी कार्य तीब्र बनाएका हुन्।सम्भावित स्थानमा खोजी गर्न नेपाल प्रहरी दैलेखका डिएसपी हरीबहादुर ओली र सशस्त्र प्रहरी दैलेखका जीवन भट्टराई त्यस तर्फ गएका छन्।

आवश्यक उद्धारका लागि हेलिकप्टर समेत तयारी अवस्था राखिएको छ। सुरक्षा संवेदशनशिलतालाई मध्यनजर गर्दै घटनास्थल तर्फ पठाउन हेलिकप्टर तयारी अवस्थामा राखिएको हो।

सुरक्षाकर्मीहरु दैलेख कालिकोट सीमा नजिक पुगेपनि अहिलेसम्म अध्यक्ष शाहीको अवस्था पत्ता लाग्न सकेको छैन।

जिल्लाबाट थप प्रहरी पुग्न लामो समय लाग्ने भएकाले केही दिनदेखी गाउँमै गस्तिमा रहेको नेपाल प्रहरी र सशत्र प्रहरी स्थानीय प्रहरी चौकीहरुबाट प्रहरी परिचालन भएको छ। दैलेख, कालिकोट र अछामबाट प्रहरी टोली खटिएको भएपनि अपहरण गरेर लगेको ठाउँबारे अँझै प्रहरी अनविज्ञ छ। विप्लव नेतृत्वको नेकपा कार्यकर्ताले दैलेखबाट अपहरण गरेका गाउँपालिका दम्पतीमध्ये इला शाही सम्पर्कमा आउनुभएको छ ।

इलाले कालीकोटबाट फोन गरेको तर उहाँले आफूलाई नेकपाले नछोडेको बताउनुभएको आफन्तले बताएका छन् । उहाँले आफू कालीकोटको सिमाना नजिक भर्ता लेकको आसपासमा रहेको पनि जानकारी गराउनुभएको छ ।