एजेन्सी,  २६ मंसिर । भारतीय संसदको दुबै सदनले नागरिकता संशोधन विधेयक पारित गरेपछि त्यसको विरोधमा नागरिकहरु आन्दोलनमा उत्रिएका छन् । नागरिक आन्दोलन हिंसा र आगजनीमा परिणत हुन थालेपछि कतिपय राज्यमा सरकारले कर्फ्यु नै लगाएको छ ।

पूर्वोत्तर भारतको आसाम राज्यमा दंगा नै फैलिएको छ । जसका कारण गुवाहाटीमा अनिश्चितसमयका लागि कफ्र्यू नै लगाइएको छ । प्रदर्शनकारीले रेल स्टेशनमै तोडफोड र आगजनी गरेका छन् । प्रदर्शनकारीहरु कर्फ्युको अवज्ञा गरेर आन्दोलनमा उत्रिएका छन् । त्रिपुरामा पनि प्रदर्शन थालिएको छ ।

स्थानीय प्रशासनले सेना परिचालन गर्नेसम्मको तयारी गरेको भारतीय सञ्चारमाध्यमहरुले जनाएका छन् । गुवाहाटी, राजधानी दिसपुर तथा संकटग्रस्त क्षेत्रमा केन्द्रीय अर्धसैनिक बल र राज्य सुरक्षा बल तैनाथ गरिएको छ । रेल स्टेशनहरुमा उच्च सतर्कता अपनाइएको छ । कतिपय जिल्लामा इन्टरनेट सेवासमेत बन्द गराइएको भारतीय मिडियाहरुले लेखेका छन् ।

आसाममा दंगा भड्किएपछि प्रधानमन्त्री नरेन्द्र मोदीले आसामी जनताको भाषा, संस्कृति र आधिकार कसैले पनि खोस्न नसक्ने भन्दै शान्त रहन अपील गरेका छन् ।

लोक र राज्यसभा दुबैको बहुमतले नागरिकता विधेयक पारित गरेको हो । बुधबार राज्यसभाको १२६ सांसद पक्ष र १०५ सांसद विपक्षमा उभिएप्छि विधेयक पारित भएको हो ।

प्रधानमन्त्री नरेन्द्र मोदीले यो कानुनले वर्षौंदेखि उत्पीडनमा परेकाहरुको पीडा अन्त्य हुने दाबी गरिरहँदा प्रतिपक्षी कांग्रेसले भारतीय संविधानको मूल मर्ममै प्रहार गरेको आरोप लगाएको छ । प्रतिपक्षी कांग्रेसले मात्र नभई ६ सयभन्दा बढी भारतीय लेखक, कलाकार, सिनेकर्मीलगायतले विधेयकले भारतीय लोकतन्त्रको धज्जी उडाएको टिप्पणी पनि गरेका छन् ।

नयाँ नागरिकता कानुनले भारतसँग सीमा जोडिएका अफगानिस्तान, बंगलादेश र पाकिस्तानबाट धार्मिक रुपमा प्रताडित भएर भारतमा शरण लिँदै आएका मुस्लिमबाहेकका हिन्दु, बौद्ध, शिख, जैन, फारसी र क्रिश्चियनलाई भारतीय नागरिकताका लागि बाटो खोलिदिएको छ ।

विपक्षी दलहरुले मुस्लिम समुदायलाई सरकारले भेदभाव गरेर भारतीय संविधानको धारा १४ को समानताको हकसम्बन्धी व्यवस्था उल्लंघन गरेको बताएका छन् । नागरिकता विधेयक विनाशर्त फिर्ता गर्न प्रदर्शनकारीले माग गरेका छन् । उनीहरुले टायर बालेर सडक यातायात अवरुद्ध पारेका छन् । प्रहरीले रबरका गोली र अश्रुग्यास प्रहार गरेको जनाइएको छ । दर्जनौं प्रदर्शनकारी घाइते भएका छन् । आन्दोलनमा साहित्य, कला र सँस्कृतिसँग जोडिएका मानिसको पनि समर्थन छ ।

लोकसभामा नागरिकता विधेयक पेश गर्नासाथ नर्थ इस्ट स्टुडेन्ट्स् अर्गनाइजेसन ९नेसो० नामक संगठनले १० डिसेम्बरमा गरेको पूर्वोत्तर क्षेत्र बन्द आह्वानमा आसाम, त्रिपुरा, मेघालयसहितका स्थान ११ घण्टासम्म बन्द भएका थिए । बन्दलाई अल आसाम युनियन ९आसु० र अल आसाम गोरखा स्टुडेन्ट्स् युनियन समेतका धेरै संगठनले समर्थन गरेका थिए ।

प्रदर्शनकारीले प्रधानमन्त्री नरेन्द्र मोदी र गृहमन्त्री अमित शाहको पुत्लासमेत जलाएका छन् । गृहमन्त्री अमित शाहले भने धर्मको नाममा राजनीति गर्न खोजेको भन्दै विपक्षीको आलोचना गरेका छन् ।