मोरङ,२५ मंसिर  । मोरङको बेलबारी नगरपालिका– ५ मा स्कुल बसले किचेर एक वर्षीय बालकको मृत्यु भएको छ ।
मृत्यु हुनेमा शिवकुमारी साहकी एक वर्षीय छोरा यसराज साह रहेका छन् । बिहान सवा ९ बजेको समयमा विद्यार्थी लिएर स्कुल आउँदै गरेको को १ क ३०४६ नम्बरको कसेनी बोर्डिङ स्कुलको बसले यसराजलाई किचेको हो ।

इलाका प्रहरी कार्यालय बेलबारीका अनुसार कसेनी बोडिङ स्कुलको यालकेजीमा पढ्ने पाँच वर्षीय छोरा सोनुलाई लिन आएको बसमा शिवकुमारी साहले दुवै छोराहरुलाई सँगै लिएर गाडीसम्म गएकी थिइन् । सानो छोरालाई भुँईमा राखी छोरा घस्रिँदै बस मुनी पुगेको र  ठूलो छोरालाई बसमा चढाएपछि गुडेको बसले नावालकलाई किचेको हो । उहाँले भन्नुभयो विद्यार्थी चढेपछि हतार गर्दै हुँइकिएको बसले किच्दा नाबालकको घटना स्थलमै मृत्यु भएको हो ।

सोनुलाई बसमा चढाउँदा भुँईमा राखेको छोरा घस्रिँदै बस मुनी पुगेका थिए । बसका चालक बेलबारी नगरपालिका–६ का ४५ वर्षीय डम्बरबहादुर खड्कालाई भने प्रहरीले नियन्त्रणमा लिएको छ ।