काठमाडौं, ९ मंसिर । देश नं– ५ का मुख्यमन्त्री शङ्कर पोखरेलले वर्तमान सरकारले जनतालाई विकास र समृद्धि दिएको बताउनुभएको छ । प्रेस सङ्गठन दाङले आज तुलसीपुरमा गरेको पत्रकार सम्मेलनमा मुख्यमन्त्री पोखरेलले सरकार राष्ट्रिय हितका पक्षमा दृढताका साथ अघि बढेको र सीमा विवाद समाधान गर्न गम्भीर रहेको छ भन्नुुभयो ।
सीमा विवाद चलिरहेका बेला काँग्रेस सभापति शेरबहादुर देउवाबाट हल्का टिप्पणी आउनु गलत भएको भन्दै त्यस विषयमा गल्ती बोलेको स्वीकार्न सुझावसमेत दिनुभयो । लामो समयसम्म सरकारमा बसेको काँग्रेसले अहिले जनताको आशालाई निराशामा बदल्न खोजेको आरोप लगाउनुभयो । यसैबीच आज नै दङ्गीशरण गाउँपालिकाको हेकुलीमा भएको चुनावी सभालाई सम्बोधन गर्नुहुँदै नेपाल कम्युनिष्ट पार्टी९नेकपा०का प्रदेश इञ्चार्ज रहनुभएका मुख्यमन्त्री पोखरेलले पश्चिम दाङमा जनताले पाँच वर्षका लागि नेकपालाई मतदान गरेको भन्दै अबको उपनिर्वाचनमा विगतको जनमतलाई कायम राख्न आग्रह गर्नुभयो ।
उहाँले भन्नुभयो, “तपाइँहरुले नेकपालाई भरोसा गरेर पाँच वर्षका लागि जिताउनुभएको हो । अहिले पनि त्यसैलाई निरन्तरता दिनुहोस् यो नै अहिलेको उपनिर्वाचनको विशेषता हो ।” मुख्यमन्त्री पोखरेलले प्रदेश सरकारले दाङमा सडकलाई प्राथमिकता दिएको भन्दै दामोदर सडक, मदन भण्डारी राजमार्ग, राप्ती लोकमार्ग तथा तुलसीपुर–अमिलिया, लमही–घोराही, घोराही– तुलसीपुर सडकखण्ड स्तरोन्नतिको प्रक्रिया अघि बढाइएको उल्लेख गर्नुभयो ।
प्रतिक्रिया दिनुहोस्