काठमाडौं, ९ मंसिर । उर्जा, जलस्रोत तथा सिँचाइमन्त्री बर्षमान पुनले नेपालको ऊर्जा क्षेत्रको विकासका लागि चीन सरकारको सहयोग आफूहरुका लागि महत्वपूर्ण रहेको बताउनुभएको छ ।

चीनको युनान प्रान्तका गभर्नर रुएन चेङगफासँग आज भएको भेटवार्तामा मन्त्री पुनले सो आग्रह गर्नुभएको हो । सिंहदरबारस्थित ऊर्जा मन्त्रालयमा भएको भेटमा द्विपक्षीय हितका साथै ऊर्जा क्षेत्रमा लगानी गर्नेबारे छलफल भएको मन्त्री पुनको सचिवालयले जनाएको छ ।मन्त्री पुनले चिनियाँ राष्ट्रपति सी चिनफिङको गत महिना भएको नेपाल भ्रमणबाट दुई देशबीचको सम्बन्ध सुदृढ बनेको भन्दै उच्चस्तरीय भ्रमणले जनस्तरमा समेत सम्बन्ध सुमधुर हुने विश्वास व्यक्त गर्नुभएको थियो ।

“नेपाल र चीनबीच लामो समयदेखि राजनीतिक, प्रशासनिक र जनस्तरको सम्बन्ध रहेको छ । यस प्रकारका उच्चस्तरीय भ्रमणले चिनियाँ नागरिकलाई नेपाल भ्रमणका लागि प्रोत्साहनसमेत गर्नेछ भन्ने मेरो विश्वास छ”, मन्त्री पुनले भन्नुभयो । नेपाल भ्रमणका क्रममा आइतबार काठमाडौँ आउनुभएका गभर्नर चेङगफा नेतृत्वको आठ सदस्यीय प्रतिनिधिमण्डलले ऊर्जामन्त्री पुनसहित मन्त्रालयका अधिकारीसँग छलफल गरेको हो । छलफलमा ऊर्जा क्षेत्रमा गर्ने लगानी, पर्यटन र कृषि क्षेत्रमा सहकार्य गर्नेबारेमा छलफल भएको थियो । मन्त्री पुनले तामाकोशी तेस्रो जलविद्युत् आयोजनामा युनानको प्रान्तीय सरकारले नै लगानी गर्ने खबर आफूले प्राप्त गरेको भन्दै अन्य जलविद्युत् परियोजनामा पनि लगानी गर्न आग्रह गर्नुभयो ।

“तामाकोशी तेस्रो जलविद्युत् परियोजनामा युनान सरकारको ८० प्रतिशत लगानी रहेको जानकारी प्राप्त भएको छ । त्यसका लागि धन्यवाद दिन चाहन्छु । पछिल्लो समय चीनसहित विश्वका विभिन्न देशका लगानीकर्ताको सङ्ख्या धेरै छ”, मन्त्री पुनले भन्नुभयो । उहाँले सरकारले जलविद्युत्को क्षेत्रमा उदार नीति लिएको भन्दै नेपालको जलविद्युत्मा थप लगानीका लागि पहल गरिदिन आग्रह गर्नुभयो ।मन्त्री पुनले भन्नुभयो, “हामीले जलविद्युत् क्षेत्रमा लचिलो नीति लिएका छौँ, पहिलो दश वर्षमा आयकरसमेत छुट हुने प्रावधान छ । नेपालभित्र खपतका लागि बजारको विस्तार पनि हुँदै गएको छ । भारत, कोरिया, चीन लगायतका देशबाट पनि लगानीकर्ता आइरहेका छन् । हामी युनानबाट पनि थप लगानी होस् भन्ने आशा राख्छौँ ।”

बङ्गलादेश र भारतमा विद्युत् व्यापारका लागि ढोका खोलेको भन्दै नेपालमा पनि बजार निर्माण भइरहेको मन्त्री पुनको भनाइ थियो । उहाँले चार वर्षभित्र पाँच हजार मेगावाट बिजुली उत्पादन हुने जानकारी दिँदै नेपालले जलविद्युत्को क्षेत्रमा आमूल प्रगति भइरहेको बताउनुभयो । मन्त्री पुनले सरकारले २०२० लाई भ्रमण वर्ष मनाउने निर्णय गरेको भन्दै युनान प्रान्तका जनतालाई नेपाल भ्रमणका लागि सन्देश प्रवाह गरिदिन आग्रह गर्नुभयो ।

भेटमा युनान प्रान्तका गभर्नर चेङगफाले आफू पनि चिनियाँ राष्ट्रपतिको भ्रमणपछि नेपाल भ्रमणमा आएको भन्दै युनान प्रान्तको सरकार नेपालमा कृषि, ऊर्जा, प्रविधि र पर्यटन क्षेत्रमा सहकार्य गर्न इच्छुक रहेको बताउनुभएको थियो । गभर्नर चेङफाले तामाकोशी तेस्रो जलविद्युत् आयोजनामा युनान सरकारले लगानी गरेको भन्दै यो आयोजना शुरुआत मात्र भएको र आगामी दिनमा युनानले जलविद्युत् क्षेत्रमा थप लगानी गर्ने धारणा राख्नुभयो ।

उहाँले चिनियाँ राष्ट्रपतिको नेपाल भ्रमणका क्रममा काठमाडौँ–केरुङ रेलवे परियोजनाको अध्ययन गर्ने समझदारी भएको भन्दै रेलवे परियोजना निर्माणसँगै युनान प्रान्त र नेपालको व्यापारमा वृद्धि हुने विश्वास व्यक्त गर्नुभयो । युनान प्रान्तका गभर्नरले कुनमिङमा आयोजना हुने ‘कुनमिङ साउथ एशिया एक्स्पो’मा सहभागी हुन मन्त्री पुनलाई निमन्त्रणासमेत दिनुभएको मन्त्री पुनका प्रमुख स्वकीय सचिव दुर्गाप्रसाद चापागाईंले जानकारी दिनुभयो ।