काठमाण्डौ, २३ कार्तिक ।
नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवाले भारतलाई रिझाउन फेरी संविधान संशोधन गर्ने अभिव्यक्ति दिएको आरोप लगाउनु भएको छ ।
अध्यक्ष ओलीले प्रधानमन्त्री देउवाले जनकपुरमा दिएको संविधान संशोधन गर्ने अभिव्यक्ति भारतलाई खुसी बनाउने आशयका साथ आएको दावी गर्नु भएको हो । उहांले संविधान संशोधन गर्ने प्रधानमन्त्रीको अभिव्यक्ति मधेशको जनताका अधिकारका लागि नभएर भारतीय नागरिकलाई राष्ट्रपति र मुख्यमन्त्री बनाउने नियतका साथ आएको भन्दै आक्रोश पनि व्यक्त गर्नु भयो । बिहीबार काठमाडौं क्षेत्र नम्बर ४ का पार्टीका उम्मेदवार राजन भट्टराईको चुनावी सभालाई सम्बोधन गर्दै उहांले भारतीय सिमापारी नेपालका हजारौं मालबाहक सवारी साधन खुलाउन बोल्न नसक्ने प्रधानमन्त्रीले संविधान संधोधन गर्ने अभिव्यक्ति दिन लाजमर्दो भएको टिप्पणी पनि गर्नु भयो ।
अध्यक्ष ओलीले एमालेको लोकतन्त्रप्रतिको निष्ठामा प्रश्न नगर्न पनि सत्तारुढ कांग्रेसलाई चेतावनी दिनु भयो । उहांले एमालेले मुलुकलाई समृद्ध, समुन्नत, सभ्य र आधुनिक बनाउने प्रतिवद्धता पनि व्यक्त गर्नु भयो । अध्यक्ष ओलीले राष्ट्र र जनताको हितबाहेक एमालेको अरु कुनै उद्देश्य नरहेको दावी पनि गर्नु भयो । अध्यक्ष ओलीले बामपन्थी गठबन्धनले पार्टीको तर्फबाट काठमाडौं क्षेत्र नम्बर ४ मा उठाएर उम्मेदवार भट्टराई परराष्ट्र मामलाका जानकार भएको उल्लेख गर्दै उहांलाई जिताएर पठाउन पनि स्थानीय मतदातासंग आग्रह गर्नुभयो ।