काठमाण्डौं, २३ कार्तिक । काठमाडौंमा तरकारीको मूल्यले नया रेकर्ड राखेको छ । आपूर्ति व्यवस्था सामान्य रहेकै अवस्थामा तरकारीको मूल्य आकासिएको हो । कालिमाटी तरकारी तथा फलफूल बजार विकास समितिका उपनिर्देशक विनय श्रेष्ठका अनुसार तरकारीको मूल्य उच्च विन्दुमा पुगेर लगातार बढ्दो क्रममा देखिएको छ । उहाका अनुसार तिहार अघिदेखि महंगो भएको तरकारीको मूल्य अझै घटेको छैन । अहिले बजारमा स्याउ भन्दा गोलभेडा महंगो भएको छ ।

कालिमाटी बजारमा गोलभेँडाको मूल्य किलोको १२० रुपैया पुगेको छ भने खुद्रामा एक सय ५० सम्ममा बिक्री भइरहेको छ । त्यसैगरि सेतो आलुको मूल्य किलोको ७० रुपैयाँ रहेको कालीमाटी बजारमा काउलीको मूल्य ११० रुपैयाँ पुगेको छ । त्यसैगरि बोडी र मटरकोशा किलोको १३० रुपैयाँ पुगेको छ । हरियो प्याज १४० रुपैयाँ प्रतिकेजी छ । कालिमाटी बजार विकास समितिले तरकारी उत्पादन नै कम भएर नै मूलयवृद्धि उच्च भएको बताएको छ । भारतबाट आउने सुकेका तरकारी महंगिएको समितिको भनाई छ । समितिले अझै केही समय तरकारीको मूल्य नघट्ने अनुमान गरेको छ । तरकारीमा लगातार मूल्यवृद्धि भइरहँदा तरकारी उत्पादकहरुले भने राहत पाएका छन् । सम्बन्धित निकायले चासो नदेखाउदा उपभोक्ता भने मारमा परेका छन् ।