काठमाण्डौं, १४ असोज । अमेरिकी राष्ट्रपति डोनाल्ड ट्रम्पले आफ्नो चुनावी अभियान र रुसबीच कुनै साठगाँठ नरहेको दावी गरेका छन् ।

ह्वाइट हाउसले सन् २०१६ को राष्ट्रपतीय निर्वाचनमा ट्रम्पको चुनावी अभियान र रुसबीचको सम्भावित साठगाँठलाई लिएर गरिएका प्रचारबाजीबाट आफूलाई टाढै रहेको भनि ट्रम्पले ट्विीट गरेका छन् । ट्रम्पको चुनावी अभियानका पूर्व व्यवस्थापक पल म्यानाफोर्टले अभियानमा संलग्न हुनुभन्दा केही वर्षअघि युक्रेनसँग आफूले गरेको व्यावसायिक लेनदेनलाई ढाकछोप गरेको भनी आरोप अस्वीकार गरेका छन् । त्यसपछि ट्रम्पले आफ्नो चुनावी अभियान र रुसबीच कुनै साठगाँठ नरहेको भन्दै ट्वीट गरेका हुन् । म्यानाफोर्टका सहयोगी रिक गेट्सले पनि कालो धनलाई सेतो बनाएको भनी आरोप अस्वीकार गरेका छन् । ह्वाइट हाउसकी एकजना प्रवक्ताले दुई जनाविरुद्ध लगाइएका आरोप र ट्रम्पको चुनावी अभियानबीच कुनै सम्बन्ध नरहेको बताएकी छन् । रुसले पनि ट्रम्पको चुनावी अभियानमा आफ्नो संलग्नता रहेको भनी आरोपको खण्डन गर्दै आएको छ ।