काठमाडौं, २३ असार । राष्ट्रपति विद्या भण्डारीले बैंक तथा वित्तिय संस्थाहरुलाई उत्पादनशील क्षेत्रमा लगानी बढाउन आग्रह गर्नु भएको छ ।

राष्ट्रपति भण्डारीले नेपाल राष्ट्र बैंकले जनताद्धारा संकलित निक्षेपलाई उत्पादनशील क्षेत्रमा लगानी गरेर मुलुकको आर्थिक विकास र सुशासनमा थप योगदान पु¥याउने विश्वास पनि व्यक्त गर्नु भयो । नेपाल राष्ट्र बैंकको बालुवाटारस्थित केन्द्रिय कार्यालय भवनको सोमबार एक कार्यक्रमका बीच शिलान्यास गर्दै उहाँले वित्तिय संघ, संस्थाहरुलाई मुलुकको आर्थिक वृद्धि गर्न र वित्तिय अनुशासनलाई कायम गर्न नेपाल राष्ट्र बैंकले आवश्यक अनुगमन र नियमनको कामलाई प्रभावकारी बनाउने अपेक्षा पनि गर्नु भयो ।

कार्यक्रममा बोल्दै नेपाल राष्ट्र बैंकका गभर्नर डा. चिरञ्जीवी नेपालले बैंक तथा वित्तिय संस्थाहरुलाई जनताप्रति उत्तरदायी बनाउने गरी कामलाई अघि बढाउने प्रतिवद्धता व्यक्त गर्नु भयो । उहँले मुलुकको आर्थिक विकासका लागि कृषि, उर्जा र पर्यटन क्षेत्रमा लगानी बढाइएको पनि बताउनु भयो ।

राष्ट्रपति भण्डारीले शिलान्यास गर्नु भएको सो भवन अगाडी दुई तला र पछाडी चार तलाको हुनेछ । राष्ट्रिय पुनर्निर्माण प्राधिकरणले निर्माणको जिम्मेवारी लिएको सो भवनको अनुमानित लागत २ अरव ८ करोड रहेको नेपाल राष्ट्र बैंकका डेपुटी भगर्नर चिन्तामणि शिवाकोटीले जानकारी दिनु भयो ।

साँढे ६१ रोपनी क्षेत्रफलमा निर्माण गर्न लागिएको सो भवन २०७८ साल भदौ महिनाभित्र निर्माण सम्पन्न गर्ने लक्ष्य लिइएको छ । त्यस भवनको निर्माण कम्पनी भने सिके समानान्तर जेभी रहेको छ ।