काठमाडौं, १२ असार । नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्ड र नेपाली कांग्रेसका सभापत्ति शेर बहादुर देउवा बिच भेटवार्ता भएको छ ।
आज ललितपुरको समिट होटलमा भएको भेटवार्तामा शान्ति प्रक्रियालाई निष्कर्षमा पुर्याउने विषयमा छलफल भएको नेकपा उच्च स्रोतले जानकारी दिएको छ ।

देउवासँगको भेट वार्ता नेकपाका अध्यक्ष समेत रहेका प्रधानमन्त्री केपी शर्मा ओलीसँगको सल्लाह अनुरुप नै भएको बालुवाटार स्रोतले जानकारी दियो । स्रोतका अनुसार दुई नेताबीचको बार्तामा शान्ति प्रक्रियालाई टुंगोमा पुर्याउन उच्चस्तरीय समझदारीका साथ अघि बढने सहमतिसमेत भएको छ ।

‘दुई अध्यक्षबीच छलफल भएर नै अध्यक्ष प्रचण्डले देउवासँग बार्ता गर्नुभएको हो, हिजोको शान्ति प्रक्रियाका सहयात्री दल रहेकोले सत्ता र प्रतिपक्षी नभनी उच्चस्तरीय सहमतिका साथ अघि बढन बार्ता फलदायी रह्यो,’ बालुवाटार स्रोतले बतायो । स्रोतका अनुसार प्रचण्ड र देउवाबीच छिटै प्रधानमन्त्री ओलीसहित तीन नेताको बैठक बसेर शान्ति प्रक्रियाको बाँकी काम टुंग्याउने सहमति बनेको छ ।

अव प्रधानमन्त्रीसहित तीन नेताबीच उच्चस्तरीय बैठक हुने स्रोतले बताएको छ । भेटमा अध्यक्ष प्रचण्डले सरकार प्रतिपक्षीसँग समग्र बिषयमा सहमतिका साथ अघि बढन चाहेको भन्दै समृद्ध नेपाल निर्माणको लक्ष्य हासिल गर्न सहकार्यको प्रस्ताव गर्नुभएको समेत स्रोतले बतायो । देउवासँगको भेटमा प्रधानमन्त्री र आफूबीच छलफल भएरै पहिलो चरणमा बार्ताका लागि आएको जानकारीसमेत दिनुभएको थियो ।