काठमाडौं,२७ बैशाख । अर्थमन्त्री डा. युवराज खतिवडाले आर्थिक वृद्धिदर बढेका क्षेत्रहरुमा करको दायरा बढाउन आन्तरिक राजस्व विभागलाई निर्देशन दिनुभएको छ ।

अर्थमन्त्री खतिवडाले कर योग्य क्षेत्रमा एक पैसा पनि कर नछोडन र अनावश्यक क्षेत्रमा कर असुली नगर्न पनि सम्बन्धित निकायलाई सचेत गराउनुभयो । आज आन्तरिक राजस्व विभागले काठमाडौंमा आयोजना गरेको एक कार्यक्रममा बोल्दै उहाँले ८ प्रतिशतसम्म आर्थिक वृद्धिदर भएका क्षेत्रहरुमा करको दायरा बढाउन ढिलाई गरिएकोमा पनि आक्रोश पनि व्यक्त गर्नुभयो ।

कृषि क्षेत्रबाहेकका अन्य क्षेत्रमा ६, ७ र ८ प्रतिशतसम्म आर्थिक वृद्धिदर भएकाले त्यसको करको दायरा बढाउन ढिलाई गर्न नहुने अर्थमन्त्री खतिवडाको भनाई छ ।

अर्थमन्त्री खतिवडाले ‘सेल्स प्वाईन्ट’ मै मूल्य वृद्धि कर असुली गर्न पनि आन्तरिक राजस्व विभागका कर्मचारीहरुलाई सचेत गराउनुभयो । उहाँले सेल्स गर्ने तर मूल्य अभिवृद्धि कर तीर्न महिनांै लगाउने प्रथाको अन्त्य गरेर अघि बढने योजना पनि अघि सार्नुभयो ।