बागलुङ, २४ चैत्र । निबन्धकार एवं पूर्वशिक्षामन्त्री दीनानाथ शर्मालाई राष्ट्रिय पुरस्कार’ प्रदान गरिएको छ । रत्न श्रेष्ठ पुरस्कार गुठी बागलुङले शनिबार बिशेष कार्यक्रमका बीच शर्माको आत्मपरक निबन्ध कृति ‘बाह्रखरीको बोटमुनी’ का लागि पुरस्कार प्रदान गरेको हो ।

पुरस्कारको राशि जनही २५ हजार रहेको गुठीले जनाएको छ । साहित्यकार तथा अन्वेषक प्रेम छोटाले आफ्नी स्वर्गीय आमा रत्नकुमारी श्रेष्ठको स्मृतिमा विसं २०३४ सालमा पुरस्कार स्थापना गरेका थिए । रत्न श्रेष्ठ पुरस्कार गुठीलाई देशकै जेठो मध्येको एक पुरस्कार संस्था मानिन्छ ।

पुरस्कार बितरण पछि बोल्दै पूर्व शिक्षामन्त्री दीनानाथ शर्माले समाजलाई बदल्न साहित्य सँस्कृतिका भूमिका अहम हुने भएकाले यसका लागि सबैले सहयोग, समन्वय गर्नुपर्नेमा जोड दिनुभयो । उहाँले आमाको नाम र सम्मानमा स्थापित पुरस्कारले पुरस्कृत हुन पाउनु सौभाग्य भएको बताउनुभयो ।

गुठीले हरेक दुई÷दुई वर्षमा पुरस्कार प्रदान गर्दै आएको छ । कार्यक्रम रत्न श्रेष्ठ पुरस्कार गुठीका संस्थापक संरक्षक प्रेम छोटाको अध्यक्षता, प्रवन्ध सदस्य तथा बरिष्ठ अधिवत्ता पद्मनाथ शर्माको स्वागत, देवबहादुर श्रेष्ठको धन्यवाद मन्तव्य र हरिप्रसाद पाण्डेको सञ्चालनमा सम्पन्न भएको थियो ।