बुटवल, ७ फागुन । राष्ट्रिय समाचार समिति(रासस)लाई समय सापेक्ष र गुणस्तरिय संस्थाको रुपमा विकास गर्न आवश्यक रहेको सरोकारवालाहरुले बताएकाछन् ।
राष्ट्रिय समाचार समिति(रासस) प्रदेश नं ५ ले आज बुटवलमा आयोजना गरेको ५८ औं वार्षिकोत्सव तथा पुरस्कार वितरण समारोहमा उनीहरुले राससले प्रादेशिक संरचनामा लैजान ढिला गर्न नहुने बताउंदै राससले प्रादेशीक बुलेटिन प्रकाशन गर्नु सुझाव समेत दिएका छन । समारोहमा बोल्दै प्रदेश ५ सरकारका आन्तरिक मामिला तथा कानून मन्त्री कुल प्रसाद केसीले नीजि क्षेत्रका मीडिया र राष्ट्रिय समाचार समितिबीचको सहकार्यले मिडियाको विकास हुने उल्लेख गर्दै संघीय मोडेलमा प्रवेश गरेपछि यसको प्रभावकारीता वढने विश्वास व्यक्त गर्नुभयो ।
उहाँले सञ्चार सम्वेदनशिल क्षेत्र भएकोले सफलता र असफलताको निक्र्यौल मीडियाले गर्ने धारणा व्यक्त गर्दै राससलाई गुणात्मक उचाईमा लैजान आवश्यक भएको बताउनुभयो ।
प्रदेश नम्बर ५ प्रदेशसभामा बिपक्षीदलका नेता बलदेव शर्मा पोखरेलले निष्पक्ष पत्रकारितागर्न संचारमाध्यमलाई सुझाव दिनुभयो । उहाँले निष्पक्ष पत्रकारीतालेनै समाजलाई सहि दिशातर्फ डोर्याउने बताउंदै संचारमाध्यम जिम्मेवार हुनुपर्नेमा जोड दिनुभयो ।
कार्यक्रममा राससको प्रदेश नं ५ का विभिन्न जिल्लामा कार्यरत चार स्थानिय समाचारदातालाई पुरष्कृत गरिएको छ । पुरस्कृत पत्रकारहरुलाई जनही रु. ५ हजार नगद सहित प्रमाणपत्र प्रदान गरिएको थियो । पुरस्कृत हुनेमा फोटोतर्फ उत्कृष्ट रुपन्देही लुम्बिनीका नरेश केसी, श्रव्यदृश्यतर्फ उत्कृष्ट पाल्पा बेझाडकी शुसिला रेग्मी, तथा उत्कृष्ठ रिपोटीङमा दाङ घोराहीकी रिता लामा र उत्कृष्ठ आलेखमा दाङ नारायणपुरका नविन नेपाली छन् ।