पाल्पा ,२० कात्तिक । तिहार भाईटिका नजिकिदै जादाँ पाल्पाका ढाका पसलहरुमा भिडभाड बढेको छ । टिकाको दिन, दिदि बहिनीहरुले दाजुभाई लाई निधारमा सप्तरङ्गि टिका, शरिरमा फूलको माला र शिरमा पाल्पाली ढाका टोपि लगाउने परम्परा रहदै आएको छ ।

भाई टिकाको दिन दिदि बहिनीले दाजु भाई लाई टिका संगै पाल्पाली ढाका टोपि, आस्कोट, र दाजु भाईले दिदि बहिनी लाई चोलो, पछ्यौरा, मनी व्याग लगायतका सरसमान उपहार आदान -प्रदान गर्ने प्रचलन रहेको छ ।

तिहारको आगमन संगै अहिले पाल्पाली ढाकाका कारीगढहरुलाई सरसमान निर्माण गर्न भ्याई नभ्याई भएको छ । तिहारको समयमा दिदि बहिनीले ढाका टोपि, दाजुभाईले पछ्यौरा सल, व्याग उपहार लैजाने गरको कार्की ढाका कपडा पसलकी प्रोपाईटर कोपिल कार्कीले बताउनु भयो ।

तिहार पछि जाडो समय शुरु हुने भएकोले पनि दिदी बहिनी दाजुभाईले शरिरलाई चिसो बाट बचाउन ढाकाका सरसमान उपहार दिने चलन बढ्दै गएको हो । सप्तरङ्गी टिका संगै शिरमा पाल्पाली ढाका टोपि नभएमा शिरको शोभा नै नहुने भएकोले परम्परा देखी टोपि लगाउने प्रचलन रहेकोले पनि ढाका टोपि अनिवार्य बन्दै आएको छ । अन्य समयमा टोपि नलगाउनेहरुले पनि भाईटिको दिन टिका संगै टोपि चाहिने भन्दै दिदि बहिनीहरु ढाका पसलमा धाएको पाईन्छ ।

प्रत्येक बर्ष पाल्पाली ढाकाको व्यापार बढ्दै गएको छ । दशै तिहारमा मात्र पाल्पामा ७० प्रतिशत टोपिको व्यापार हुदै आएको छ । १ वटा पाल्पाली ढाका टोपीको मूल्य १ सय रुपैया देखी १ हजार २ सय रुपैया सम्म पर्दै् आएको छ । सामान्य परिवार देखी उच्च बर्गका व्यक्तिहरु लाई लक्षित गरी ढाकाका सामाग्रीहरु उत्पादन हुदै आएको छ ।
तानसेनमा मात्र करीब १० वटा ठुला ढाका उद्योग रहेका छन ।

घरेलु तथा साना उधोग विकास कार्यालयमा ३० वटा ढाका उधोग दर्ता भएकोमा हाल २५ वटा ढाका उधोग संचालनमा रहेका छन । हाल पाल्पाली ढाका बाट करीब १ हजारले रोजगारी पाएको बार्षिक रुपमा २० करोड सम्मको कारोवार हुदै आएको छ । २०१५ सालमा एउटा तान बाट स्व गणेशमान महर्जनले शुरु गरेको पाल्पाली ढाका कपडा अहिले देशकै नमुना कपडा उधोगको रुपमा परिचित भएको छ ।

राष्ट्रिय चर्चामा आएका पाल्पाली ढाका जस्ता उद्योग लाई माथि उठाउने ठोस योजना प्रस्ताव आएमा नेपाल कपडा उत्पादनमा आत्मनिर्भर हुनेछ ।